Mga Bulawanong Lagda

7th Sunday in Ordinary Time (February 20, 2022)
1 Samuel 26:2, 7-9, 12-13, 22-23 / Ps 103:1-2, 3-4, 8, 10, 12-13 / 1 Cor 15:45-49 / Lk 6:27-38

Ang unang pagbasa, makapadani kanato ang gibuhat ni Davod nga wala pagpatay kang Saul, tungod kay si Saul pinili sa Dios. Usa kini ka pagtulun-an kanatong tanan alang sa pagtahud sa mga iya sa Ginoo. Daghan kanato karon ilabi na ang anaa sa pangatungdanan nga nagpasipala sa mga tawong pinili sa Dios, sama sa mga pari, mga madre o mga relihiyoso, missioneros o mga lideres sa mga kapunongan nga nag-alagad sa Dios. Sakit ra ba kaayo ang mga pulong sa Dios niadtong nagbuhat niini, “ayaw siya patya, kay ang mopatay sa pinili sa Ginoo, silotan gayud”. Bisan luyo sa mga sala sa mga pinili sa Dios, dili gayud sila angay nga pasipad-an.

Ang gitudlo kanato mao ang paghigugma sa mga tawong nakasala. Ang atong ebanghelyo nagpamatuod niini pinaagi sa mga pulong mismo ni Jesus. “Higugmaa ninyo ang inyong mga kaaway ug buhata ang maayo alang niadtong nagdumot kaninyo. Ug uban pang mga bulawanong mga lagda nga angayang buhaton sa matag binunyagan. Alang kang Jesus ang labing mahinungdanon nga buot niyang tukoron nga katilingban, nagsumikad diha sa tiunay nga kasinatian sa Dios Amahan, diin siya puno sa kalumo sa kasingkasing nga nahigugma sa tanan. Iyang gipadala ang iyang bugtong Anak aron pagluwas sa katawhan nga makasasala. Mao kini ang angay batonan sa matag Kristyano, nga ang Dios mismo nagtinguha sa atong kinatas-ang kaayohan ug nagtudlo kanato sa pagbuhat sa ingon bisan ngadto sa mga tawong nakasala kanato, nagdumot ug nang-abuso kanato.

Dili nato hikalimtan nga mabuhat lamang usab nato kini pinaagi sa lamdag sa Espiritu Santo. Kay matud pa ni Jesus aduna kitay motabang kanato o abogado nga mopuno kanato sa kahayag aron magmalampuson kita sa pagbuhat sa mga bulawanong lagda sa gugma. Sa pag-ampo ni Blessed James Alberione, “Kon ako lamang , wala akoy mabuhat, apan uban sa Ginoo o sa Espiritu Santo, mabuhat ko ang tanan. Busa alang sa gugma sa Dios, buot kong mabuhat ang tanan. Sa Dios ang himaya, ang akoa mao ang langit.”