Kinsa Ako?

8th Sunday in Ordinary Time (February 27, 2022)
Sir 27:4-7 / Ps 92: 2-3. 13-14. 15-16 / 1Cor 15: 54-58 / Lk 6:39-45

Ang makahimo kanato nga kinsa kita, dili ang atong naipong sweldo o pisikal nga kusog , dili ang atong kalampusan sa negosyo, ug dili gani ang atong IQ o atong EQ. Unsa man diay? Ang makahimo kanatong kinsa kita mao ang atong “kasingkasing”- nga mao ang pinaka-uyukan sa atong personalidad, ang suludnong sanctuaryo, nga mao ang tinubdan sa mga desisyon, ug unsang matang nga tawo ang buot natong himoon sa atong kaugalingon. Nagtimaan kini: sa atong mga sistema sa mga hiyas o bili nga atong gihuptan, atong suludnong disposisyon, atong mga idolo ug ang atong mga prioridad sa kinabuhi.

Apan unsaon nato pagkahibalo kon unsay anaa sulod sa kasingkasing sa tawo? Unsaon nato pagkahibalo kon ang atong kasingkasing hingpit ba nga kabahin sa gingharian sa Dios o napuno na sa mga dautang buhat sa yawa. Ang unang seguradong timaan mao ang atong mga Pulong. Bisan kon kini nakasulat o gipamulong mao kini ang nagpadayag sa unsay gibati, sa unsay mga intensyones, sa unsay mga panginahanglan, sa unsay atong mga plano og mga damgo.

Ang atong mga kasinatian, hinoon nagtudlo kanato nga adunay mga tawo nga migamit sa mga pulong aron pagtago sa kamatuoran kay sa pagpadayag niini. Mao kini ang atong gitawag nga mga tawong bakakon o limbongan.

Ang ilang pagkabakakon pinaagi sa pulong nagtimaan nga ang ilang kasingkasing nahilayo sa kamatuoran- nahilayo sa Dios. Apan nahibalo kita nga walay nakatago nga dili mabutyag ug ang kamaksot sa kamatuoran nga gitago sa kasingkasing sa mga bakakon ug limbongan makit-an diha sa bunga nga makalolouy.

Labaw sa tanan ang Aksyon o Buhat nga gipadayag gikan sa sulod sa kaugalingon ato usab hatagag atensyon. Busa sa giingon ni Jesus, ang matag kahoy mahibaloan pinaagi sa iyang bunga, mao usab ang tawo maila pinaagi sa iyang buhat o aksyon. Busa si Jesus miingon sa atong Ebanghelyo karon nga:” ang maayong tawo magsultig maayo gikan sa maayong mga butang nga anaa sa iyang kasingkasing ; apan ang tawo nga dautan magbuhat og dautan gikan sa mangil-ad nga mga butang sa iyang kasingkasing.”

Busa ang atong paningkamotan dili mao ang pagsulti sa mga maayong pulong o mobuhat sa maayong buhat kondili ang pagpanag-iya sa “maayong kasingkasing.”

Kasingkasing nga sa kanunay nagapangita sa gingharian sa Dios, ug ang iyang mga sugo. Mao kini ang sukaranan nga kondisyon nga mahimong “maayong persona- maayong kahoy” nga mamunga sa maayong bunga. Kon tukma ang atong pondasyon mamahimo na kitang sama kang Cristo. Kay nakahimo na man kita sa pagkuha sa dakung troso diha sa atong mga mata, makuha usab nato ang puling sa atong isigkatawo. Makahimo usab kitang makamugna ug katilingban nga magmabungahon. (Reference: Word of Life Publication)