Kalipay diha sa Pagsunod sa Dios

6th Sunday in Ordinary Time (February 13, 2022)
Jer 17:5-8 / Ps 1:1-2, 3, 4 and 6 / 1 Cor 15:12, 16-20 / Lk 6:17, 20-26

Mga kaigsuonan ania na kita karon sa ika-unom nga Domingo sa Ordinaryong panahon. Ang atong ebanghelyo karon naghisgot mahitungod sa pagpanudlo ni Jesus didto sa bungtod nga diin siya nagpunting kon unsa gayod ang tinood nga kalipay. Ang kalipay nga atong masinati samtang kita nagsunod kaniya. Kini usa ka kalipay nga walay kalibutanong mga butang nga makatupong niini. Gani, kini nagkinahanglan ug dakong kombiksyon sa atong kaugalingon aron madawat nato kining maong kalipay. Nagkinahanglan kini ug dakong pagtuo sa atong Ginoo aron kining maong kalipay atong makuha pinaagi sa iyang mga pagtulon-an.

Si Jesus mao lamang ang atong hingpit nga kalipay. Siya ang magpuno sa atong mga kakulang sa pagsinati sa matuod nga kalipay. Apan unsa ba kining matuod nga kalipay nga gustong ipasinati ni Jesus kanato? Kini mao ang pagsunod sa iyang mga sugo ug palabihon ang pagsunod sa iyang mga sugo kaysa mga kalibutanong mga kadaogan ug kalampusan. Ang matuod gayod nga makahatag ug kalipay mao lamang ang pagbutang sa mga sugo sa Dios diha sa atong kinabuhi. Ang tawo nga puno sa birtud sa Ginoo nahisama sa kahoy nga mamunga ug daghan tungod kay kini natanom man diha daplin sa suba. Ang tawo nga duol sa Dios mamunga ug daghan kay gihatagan man siya sa Dios ug grasya aron molambo ug molipang.

Apan kining tanan mahimo lamang kon atong ibutang si Kristo diha sa atong kinabuhi. Ang atong ikaduhang pagbasa naghisgot mahitungod sa pagpuyo uban kang Kristo. Mamahimo lamang nga kawang kining tanan nga atong mga paningkamot kon ang atong kinabuhi wala mahisubay diha kang Kristo. Si Kristo nga namatay ug nabanhaw mao ang sukdanan sa tanan natong pagtuo ug paglaum. Kay matud pa ni San Pablo kon wala mabanhaw si Kristo Jesus nan ang atong paningkamot niining kinabuhia mahimo lamang nga kawang. Karon atong dawaton si Jesus diha sa tagsa-tagsa nato ka kinabuhi aron maoy motultol ug mogiya sa dalan paingon ngadto sa Gingharian sa langit nga iyang gisaad kanatong tanan.

Sa katapusan dili gayod nato isalig ang atong kaugalingon diha lamang sa tawhanong paningkamot tungod kay si propeta Jeremias diha sa atong Unang pagbasa nag-ingon “Silotan ko ang tawo nga motalikod kanako ug mosalig hinuon sa mga tawo ug sa kusog sa tawo.” Matuod gayod kini pinasubay sa atong kaugalingong kasinatian nga kon ang atong pagsalig anaa lamang sa tawo dili kini malungtaron. Ang atong Salmo nagpahinumdom kanato nga nag-ingon “Bulahan kadtong nagalaum sa Ginoo.” (Bro. Soren Abellanosa)