Culmination sa Bible Month, Bible Quiz Bee gipahigayon

“Ang gugma sa Dios nag-alim sa nag-antus nga kalibutan”, mao kini ang tema sa tinuig nga bible month ug kini malampusong giselebrar sa parokya sa St. Mary of the Perpetual Rosary Parish. Ang Parish Bible Apostolate inubanan sa suporta sa Kura Paroko, Rev. Fr. Dionisio Tabiliran maoy nanguna sa pagpasiugda sa mga kalihukan sa parokya.

Balik-lantaw nganong gisaulog ang bulan sa bibliya? Ang bible week nagsugod sa panahon ni Presidente Ferdinand Marcos, Sr. kaniadtong tuig 1982 pinaagi sa iyang pagpirma sa Presidential Proclamation No.2242 nga nagdeklara sa National Bible Celebration matag Unang Dominggo sa Adbyento hangtud sa bulan sa Enero. Kini nausab pinaagi sa pag-isyu sa Presidential Proclamation No. 44 sa tuig 1986 ug gibalhin ngadto sa bulan Enero sa termino ni Presidente Corazon Aquino. Gipakusgan ang maong kasaulogan sa panahon ni Presidente Fidel Ramos pinaagi sa bag-ong giproklamang Presidential Proclamation No.12067 sa tuig 1992 ug giingon dinhi nga ang bibliya tagaan ug importansya ug ang mga basahon tutukan ug tun-an alang sa espirituwal, moral ug sosyal natong aspeto sa kinabuhi.

Si Presidente Rodrigo Duterte nagdeklara nga ang tibuok bulan sa Enero mao ang National Bible Month ug kini mao ang Presidential Proclamation No.124. Siya usab nagpirma og balaod nga sa matag katapusang Lunes sa Enero matag tuig mao ang special non-working holiday atol sa pagselebrar sa National Bible Day. Isip usa ka “predominantly Christian nation” ug pinakadakong Kristiyanong nasud sa tibuok Asya, kining maong mga kalihukan nagpasidungog sa bili sa Balaang Bibliya nga mao ang sentro sa pagtuong Kristiyanismo.

Niadtong Septiyembre 30, 2019 sa pagsaulog sa Kapistahan ni St. Jerome (translated most of the bible into Latin) ang Santo Papa Francisco nagdeklara nga ang Ikatulong Dominggo sa Enero mao ang “Sunday of the Word of God” kini nahisulod sa Apostolic Letter Moto Proprio “aperuit illis”. Ang mga pulong nga “Aperuit illis” nagrepresentar sa mga unang pulong sa Ebanghelyo ni San Lukas diin gihulagway kung ang paagi sa pagpakita sa nabanhaw’ng Hesus ngadto sa iyang mga disipulo ug kung giunsa niya giabli ang ilang mga huna-huna sa pagsabot sa Balaang Kasulatan.

Ang Bible Month Celebration gisugdan pinaagi sa Bible Enthonement nga gihimo sa Parokya una magsugod ang Santos nga Misa kaniadtong Enero 23, 2022 ug sa Hiniusang Pag-ampo sa matag GKK. Gisundan kini sa gipasiugdang Poster Making ug Bible Quiz Bee nga gitambongan sa napulo ka Sona nga sakop sa St. Mary of the Perpetual Rosary Parish.

Sa Bible Month Culmination kaniadtong Enero 30, 2022, adunay gipahigayon nga Bible Quiz Bee nga nagsugod sa alas 9:00 sa buntag diha sa St. Mary Parish gym. Pormal nga giabli ang maong kalihukan pinaagi sa pasiunang panalangin ug Bible Enthronement. Human niini gipakita sa katawhan ang obra mga miapil sa Poster Making Competition dayon misunod na ang Bible Quiz Bee. Adunay duha ka kategorya nga mao ang Adult ug Youth Category.

Ang maong kalihukan gipangulohan sa Parish Bible Apostolate Coordinator nga si Ms. Carlita Fernandez Ronquillo-Leone ug anaa usab ang presensya sa Kura Paroko nga si Fr. Diony Tabiliran. Gisuportahan usab kini sa mga miyembro sa Parish Bible Apostolate (PBA) ug mga miyembro sa Social Communications Committee (SoCCom). Si PSP Jet Garcia ang nahimong master of ceremony sa maong kalihukan. Ang mga mananaog sa Bible Quiz Bee mao kining mosunod:

Adult Category:
1st place – Theron Bill Asis of Zone 8
2nd place – Danilo Aparece of Zone 9
3rd place – Clemente Canseco of Zone 3

Youth Category:
1st place – Gerald Buagas of Zone 7
2nd place – Jeminah Leah Aunso of Zone 1
3rd place – Divine Grace Montajes of Zone 5

Ang Poster Making nakuha ni Danise Jade Leguarda nga gikan sa Zone 1.

Ang Awarding of Winners and Recognition of Participants pagahimoon karong Pebrero 6, 2022 sa alas 10:00 sa buntag inigkahuman sa Santos nga Misa.

Maingon nga nagmalampuson ang Bible Month Celebration pinaagi sa suporta sa matag sona ug sa pagtambong o pag participar sa mga nagkalain-laing kalihukan sa parokya.

Sumala pa sa giingon ni St. Jerome: “Ignorance of the Scripture is ignorance of Christ.” Hinaut nga human sa Bible Month padayon gihapon kitang tanang mga Katoliko sa pagbasa, pagtuon, pagpaminaw ug pagsabot sa Balaang Kasulatan nga anaa diha sa atong mga Bibliya. (Allyza Hope Tabigue/Marilou Pantonial)