Pagsalop ug Pagsubang diha kang Kristo

The Baptism of the Lord (January 9, 2022)
Is 42:1-4, 6-7 Or Is 40:1-5, 9-11 / Ps 29:1-2, 3-4, 3, 9-10 Or Psalms 104:1B-2, 3-4, 24-25, 27-28, 29-30 / Acts 10:34-38 Or Titus 2:11-14; 3:4-7 / Lk 3:15-16, 21-22

Ang Pangilin sa pagbunyag sa atong Ginoo mao ang katapusan sa Liturhikanhong panahon sa Pasko ug mosulod na dayon kita sa ordinaryong panahon. Ato gayong itutok ang atong mga panlantaw diha sa mahigugmaong panlantaw ni Jesucristo.

Ang bunyag sa atong Ginoo gitiman-an diha sa pagpaila Kaniya nga siya mao ang pinadala gikan sa Dios pinaagi sa tingog nga nagkompirma niini ug ang pagsugod sa iyang publikong kinabuhi diha sa pag-ayo sa mga masakiton, pagbanhaw sa mga patay, pagpalayas sa mga yawa, ug labaw sa tanan ang pagsangyaw mahitungod sa Gingharian sa Dios.

Ang tingog nga nag-ingon “Ikaw ang Akong pinalangga nga Anak. Diha kanimo nahimout Ako.” Kini usa ka pagmatuod nga ang atong Ginoong Jesucristo gikan gayod sa Dios. Tungod sa iyang pagkamatumanon sa kabubut-on sa Dios siya gikahimot-an niini.

Ang pagka-abli sa langit usa ka timaan nga giablihan pag-usab sa Dios ang Gingharian sa langit aron kita makasulod niini. Ang pagdawat nato sa bunyag usa ka panaw paingon ngadto sa bag-ong pagkatawo nga diin ang Dios lamang ang makahatag sa pinaagi sa pagbunyag sa tubig ug espiritu.

Ang ikaduha mao ang pagsugod sa publikong kinabuhi sa atong Ginoo hangtod ngadto sa dalan sa krus; sa dihang ang atong Ginoo nakadawat sa bunyag didto sa suba Jordan kini usa ka pagpangandam niya sa iyang moabot nga pagbunyag sa dugo didto sa Krus, nga nagpakita sa makaluluwas nga gahom sa Dios sa tanang katawhan.

Ang atong bunyag ug ang bunyag sa atong Ginoo adunay dakong kalambigitan. Kita nahimong miyembro sa pamilya sa Dios nga gitiman-an sa atong tagsa-tagsa ka mga bunyag. Ang atong bunyag nagtimaan nga kita nahimong bag-ong binuhat diha kang Kristo. Ang atong paglabang diha sa landong sa kamatayon ug pagsubang ngadto sa pagkabag-ong binuhat pinaagi sa atong pag-ambit kang Kristo. Kini mao ang giingon ni San Pablo diha sa iyang unang sulat ngadto sa taga-Corinto nga “kita namatay uban kaniya ug mabanhaw usab uban kniya.” Busa ang pasalig nga naggikan sa bunyag mao ang pagpaminaw kang Jesus, ang atong pagtuo kaniya ug ang atong malumong pagsunod kaniya pinaagi sa pagbuhat sa iyang kabubut-on.