Kaamguhan diha sa presensya sa Dios

5th Sunday in Ordinary Time (February 6, 2022)
Is 6:1-2A, 3-8 / Ps 138:1-2, 2-3, 4-5, 7-8 / 1 Cor 15:1-11 Or 1 Cor 15:3-8, 11 / Lk 5:1-11

Ang atong mga pagbasa karong Domingoha nagpadayag sa usa ka tawag. Ang atong Ginoo nagtawag kang Pedro aron sa pagpalawom ug pagtaktak sa iyang pukot. Ang panagtagbo ni Jesus ug ni Pedro usa ka kahigayonan sa pagsusi sa kaugalingon ug pagsanong sa kon unsa ang gusto sa Dios nga ipabuhat sa iyang kinabuhi. Kini usa ka pagpadayag nga ang Ginoo nag-uban gayod diha sa tagsa-tagsa ka kinabuhi.

Ang atong unang pagbasa sa Sulat ni propeta Isaias bahin sa iyang tawag, iyang nakita nga dili siya angayan sa maong tawag tungod kay siya adunay “mahugaw nga baba” iyang nakita ang iyang kaugalingon nga dili angayan, ug ang kahalangdon sa Dios, apan gihinluan siya Dios ug gihimo siya nga angayan sa maong tawag aron ipadala ngadto sa katawhan. Sa ato usab nga tagsa-tagsa ka kinabuhi makasinati kita ug usa ka pagbati nga dili kita angayan sa maong responsibilidad nga gisangon kanato. Apan dili gayod nato kalimtan nga ang Dios wala magkulang sa iyang grasya aron kita mamahimong matuod nga iyang pinadala ug magbuhat sa iyang gisugo kanato.

Ang kasinatian ni Pedro sa dihang iyang gikahinagbo ang atong Ginoo diha-diha siya nakamatikod nga siya usa ka makasasala ug iyang giingnan ang Ginoo nga magpalayo kaniya tungod kay siya usa ka makasasala. Ug mao usab kini ang nasinati ni Pablo sa dihang siya nakasinati sa presensya sa atong Ginoo. Iyang giisip ang iyang kaugalingon nga labing ubos sa tanan nga mga apostoles. Sa laing bahin, ang Ginoo lamang ang adunay katakus sa paghinlo sa tanan nga mga sala ug ang atong partisipasyon mao ang paghalad sa atong kaugalingon ngadto Kaniya. Siya lamang ang adunay gahom sa pagwagtang sa tanan nga babag nga nakapapugong sa pagsunod ug pagtuman sa iyang sugo.

Sama kang propeta Isaias, San Pedro ug San Pablo, bisan kon makabati kita ug kaubos sa atong kaugalingon ug dili angayan sa gisugo sa Dios kanato, atong hunahunaon nga anaa Siya kanunay nga maoy nagtawag ug magtabang sa tanan aron mahimo nato ang gusto nga iyang buot ipabuhat kanato. Atong hinumduman kanunay nga diha sa Dios ang tanan matuman gayod.

Sa katapusan, ang katawhan sa atong kalibutan nagsawom sa dagat sa kapait, kagubot ug kasakit. Karon ang hagit sa matag-usa aron ilatag ang tagsa-tagsa ka mga pukot ngadto sa lawom aron paghimamat sa Dios diha sa atong kinahiladman ug kinauyokan sa atong kaugalingon diin Siya nakigsulti kanato. (Bro. Soren Abellanosa)