Ika-17 nga Kapistahan sa Sagrada Pamilya

Usa ka adlaw human sa paghandom sa adlawng natawhan ni Hesus, gisaulog gilayon sa mga parakoyano sa Sagrada Pamilya sa Barangay Dumoy ug Baliok, inubanan sa ilang kura-paroko, Fr. Roger Duhaylungsod, DCD ang ilang ika-17 nga kapistahan uban sa tema, “ Sagrada Pamilya sumbanan sa tiunay nga kinabuhi”.

Sanglit nagpadayon pa ang hulga sa pandemya, walay mga dagkong kalikuhan ang gipahigayon sama sa mga naandan matag pista sa parokya apan ang selebrasyon nahimong makahuluganon tungod sa mga pamilya nga nitambong sa matag kasaulugan sa misa.

Atol sa Pontifical mass mga gipanguluhan sa halangdong arsobispo sa Davao, Rev. Romulo G. Valles, DD. , iyang gipadayag ang dakong kalipay nga nagsud-ong sa mga pamilyang nitambong sa misa, adunay pipila ka mga bata, mga batan-on, mga ginikanan ug mga apuhan. Matod niya usa kini ka nindot nga hulagway sa atong nasud.

Sa iyang homiliya, iyang gihatagan ug gibug-aton ang tulo ka punto:

Una, ang Pista sa Sagrada Pamilya nag-aghat kanato sa pagtan-aw sa labing ako nga selebrasyon sa pagkatawo sa atong Ginoo aron siya makig-uban sa matag-usa kanato. Ang selebrasyon dili lamang paghatag ug pasidungog sa Sagrada Pamilya ni Jose, Maria ug Hesus apan nag-ila pod kini ug naghatag ug pasidungog sa matag pamilya nga miyembro sa parokya.

Ikaduha, ang nasud Pilipinas naghatag ug dakong bili sa kinabuhi sa mga bata nga tinubdan sa kalipay sa matag pamilya. Nagpasabot nga ang matag pamilya nag-amping ug nag-atiman sa mga bata nga mga gasa gisan sa Dios.

Ikatulo, iyang gihagit ang mga parokyano nga puy-an ang hiyas nga anaa sa matag persona sa Sagrada Pamilya nga bisan unsa man ang masinati nga mga problema ug pagsulay, ang pamilya nagpibilin nga lig –on ug adunay pagsalig sa usag-usa.

Sa wala pa niabot ang adlaw sa pista, nagtinabangay ang mga GKK Servant Leaders ug ang pipila ka opisyales sa barangay sa pag-andam, pagpanglimpyo ug pagbutang sa mga banderitas nga nagdugang sa kadasig sa kasaulugan sa pista. (Flor Arellano-Deloria | Parish SoCCom | Holy Family Parish)