GKK Sto. Niño Upper Ilang gisaulog ang ika-41 nga kapistahan

“Kanamo malooy ka unta nga kanimo nangilaba”

Unang buwan sa tuig mao ang buwan sa Batang Hesus. Ang tibook simbahan nagsaulog sa kapistahan sa Diosnong Bata matag ika-tulo nga Domingo sa Enero. Usa kini sa mga ginapangandaman nga pista kay tungod ang mga Pilipino adunay dakong gugma sa Batang Hesus.

Mao nga malampusong gisaulog ang ika-41st ka tuig nga kapistahan ni Sr. Santo Niño nga maoy patron sa Gagmay’ng Kristohanong Katilingban (GKK) sa Upper Ilang, Zone-12 A nga nahisakop sa St. Francis Xavier Parish, Tibungco. Ang tema sa kasaulogan sa kapistahan niining tuiga nagkanayon: “Santo Niño, Bulahang anak ni Sta.Maria ug San Jose among kauban sa panaw sa lima ka gatos katuig nga paglawig sa pagtoo, paglaum ug paghigugma.”

Gisaulog usab sa Katilingban ang ika 500th anniversary sa pag-abot sa balaang imahe sa Sto.Niño sa isla sa Pilipinas. Ang Misa gipanguluhan sa ilang kura paroko, Rev. Fr. Proceso “Jun” Gimeno niadtong January 16, 2022 sa Alas Onse sa buntag.

Ang pagkahimugso sa batang Jesus dinhi sa kalibutan nagdala ug paglaum ug kaluwasan sa matag usa kanato ug pinaagi niini kita gipahinumduman sa pagka mapaubsanon ug pagkamasinugtanon. Mahisaama unta kita sa batang Jesus nga mapaubsanon ug dili gayud magpasigarbo kung unsa man ang mga bahandi nga anaa kita sa atong kinabuhi. Kining mga butanga dili gayud importante sa mata sa Ginoo, ang pagserbisyo, pagpangalagad ug pagtabang sa uban maoy mas importanteng butang nga angay natong buhaton. Ang pagkamapaubsanon maoy pinakaunang lakang sa pagsunod sa dalan ni Kristo ug sama sa batang Jesus kita pud usab angay nga magmasinugtanon sa misyon nga gihatag sa Ginoo kanato.

Bisan pa sa mga suliran nga atong gisagubang karon, gidagsa gihapon sa mga deboto sa Sto. Niño ang kapilya bisan nag-ulan nga nagpamatuod sa ilang tinood nga pag debosyon sa Sto.Niño. Apan hugot ang seguridad nga gihimo sa mga GSL’s ug gipatuman gayod ang mga health protocols sama sa pagsuot sa face mask , ug pagtuman sa social distancing. Angay gayod kita musimba ug magpasalamat sa Dios sa tanang grasya nga atong nadawat ug mag-ampo sa Batang Hesus nga panalipdan unta kita niya sa mga katalagman.

Niining kapistahan sa Diosnong Bata, kita gipahinumduman ni Kristo sa pagpabilin nga masaligon sa panabang sa Dios Amahan, mapaubsanon, masinabtanon ug mapasayloon sa isigkaingon.

Gihuman ang maong kasaulogan sa Santos nga Misa sa usa ka Traditional Sinulog Dance nga gipangandaman sa GKK. Sto. Niño Youth Apostolate.

Viva Señor Santo Niño!! Viva Pit Senyor!

(Paul Angelo Labao Gastanes | GKK Sto. Niño Upper Ilang Zone 12A)