Youth Ministry New Normal Team Building gipahigayon sa Sr. San Roque Parish-Malabog

Nagmalampuson ang programa sa mga batan-on sa San Roque Parish, Malabog uban sa tema nga “Ang Pagkamanggihatagon sa atong Kaugalingon, Nagagikan sa atong Bug-os nga Pagtoo Ngadto sa Ginoo.” Kini atol sa pagsulog sa bag-ong tuig sa Simbahang Katoliko (First Sunday of Advent), Nobyembre 28, 2021.

Tumong niini mao ang mga mosunod: 1.Mahiusa ang mga kabatan-onan; 2. Mapalig-on ug mapalambo ang pundasyon sa pagtuong Katoliko; ug, 3. Mamahimong mapaambiton sa kugalingon ug sa mga gasa nga nadawat ngadto sa uban.

Kini gisalmutan sa mga PSB (Pangulo sa Batan-on) sa nagkadaiyang GKK (Gagmayng Kristohanong Katilingban) nga nahisakop sa matag sona sa Parokya. Gisugdan ang maong programa sa kabatan-onan pinaagi sa pag-apil Santos nga Misa nga gipangulohan ni Father Arnold Balaquinto, Kura Parako. Human gisaulog ang pinakataas nga porma sa pag-ampo , gihimo dayon sa Core Group sa ministriya sa batano-on ang pagpangandam ug ang registration sa matag sona.

Sa pasiuna ni Miss Vennes Obsioma, usa ka batan-on gikan sa Virgen Dolorosa Parish, Babak, iyang gipasabot sa mga partisipante ang tema, tumong ug ang tinuud nga kahulugan sa team building. Matud pa niya, ang team building mao ang paglihok sa matag-usa nga adunay pakiglambigit sa mga kauban niini, diin adunay kooperasyon, panaghiusa, pagtinabangay ug pagsinabtanay. Ug tuud man, nagkahiusa gayud ang kabatan-onan sa pag-paminaw sa unang hilisgutan nga mao ang Pagtuong Katoliko (Catholic Faith) nga giahatag ni Bro. Junnel E. Bustamante, usa ka seminarista nga gikan usab sa Parokya sa Malabog, diin iyang gimantala ang Upat ka haligi sa Simbahang Katoliko (Kredo, Sakramento, Sugo og Pag-ampo). Isip usa ka Katoliko, ang Pagpanguros mao ang pinakamubo nga pagpadayag sa atong pagtuo, kita mituo sa Santisima Trinidad nga mao ang Amahan, ang Anak og ang Espiritu Santo.

Ug sanglit kay gisaulog man nato ang ika-500 ka tuig sa Kristiyanismo dinhi sa atong nasud nga adunay temang “Gifted to Give”, gipaambit ni Miss Vennes Obsioma ang iyang kaugalingong kasinatian sa pagkamanggihatagon sa Ginoo nga bisan pa man sa mga pagsuway nga atong masinati, anaa Siya kanunay nga mohatag sa atong mga panginahanglan, labaw pa sa atong gipangayo. Isip mga batan-on nga nangalagad sa simbahan, abli ang kasing-kasing og nagkahiusa sila sa paghimo sa buluhaton nga gihatag kanila. Diin nahatagan usab sila og higayon nga maila-ila ang matag-usa. Gitapos ang maong programa pinaagi sa pag-ampo. Inubanan sa hagit sa pagpalapnag sa ilang mga nakat-unan ngadto sa tagsa-tagsa nila ka mga GKK.

“Lahi rajud ang kalagsik, kaaktibo og kahugyaw sa mga batan-on”, mensahe ni Miss Vennes sa wala pa siya nanamilit. “Unta mausab pa ang susamang panagtapok nga puno sa kahibalo og gugma sa Ginoo”, panghinaot ni Judeylyn Crodua, batan-on nga gipadala sa Sto. Rosario-Balinsuag sakop sa sona 2. “Salamat kayo kang Father Arnold Balaquinto sa iyang pagtugot og pagsuporta kanamo, ug labaw sa tanan salamat sa Ginoo nga maoy tuburan sa tanang grasya nga among naangkon hilabina sa paghatag og kahigayonan nga kami makasalmot niinig maong kalihokan” dungag pa niya.

Puno sa kalipay og grasya ang kasing-kasing sa matag-usa nga miuli sa ilang tagsa-tagsa ka panimalay bitbit ang mga pagtulun-an og pamalandong nga ilang dalhon sa tibuok nilang kinabuhi. (Jozeil Comapas Crodua | Youth Coordinator Zone 2)