SFDA Parish Pre-Synodal Team mibisita sa lagyong mga GKK

Ang tibuok Simbahang Katoliko nangandam alang sa panagtigum sa mga Obispo sa Vatican sa tuig 2023. Isip pagpangandam, ang mga Parokya nagmugna og Parish Pre-Synodal Teams nga maoy maghatag og giya sa mga katawhan diha sa pagsubay sa proseso sa konsultasyon. Tumong sa maong konsultasyon nga mahibal-an ang panan-aw sa managlahing pundok o grupo mahitungod sa simbahan ingon man usab ang ilang kalambigitan niini. Ang pre-synodal consultation sa tagsa-tagsa ka mga parokya gipahigayon inubanan sa giya sa Espiritu Santo.

Ang San Francisco de Asis Parish Pre-Synodal Team pinangulohan sa Kura Paroko, Rev. Fr. Mark Jann Perez, OSJ, ug ang Team Leader nga si Sr. Rema S. Millan, MPS, nagpahigayon usab og mga pre-synodal consultations aron madungog ang tingog sa mga katawhan nga dili lamang sakop sa Parokya, kondili apil na usab ang mga nagkalain-laing hut-ong o grupo sama niadtong naa sa pribadong sector, mga dili aktibo sa simbahan, mga relihiyoso, miyembro sa nagkalain-laing sekta, mga nanarbaho sa gobiyerno, ug uban pa.

Gisugdan sa Parokya ang pre-synodal consultation journey niadtong Nobiyembre 7, diin ang mga miyembro sa PPC, PSL, ug mga GKK Coordinators maoy gipaminaw sa ilang mga panan-aw mahitungod sa simbahan. Pinaagi sa lamdag sa Espiritu Santo, nagmalampuson ang pinakaunang pre-synodal consultations sa Parokya.

Ang pinakaunang konsultasyon nasundan pa diha sa mga GKK. Target sa team nga mabisitahan ang walo ka mga GKK nga sakop sa Parokya.

Niadtong Nobiyembre 14, mibisita ang team sa duha ka GKK nga nahimutang sa layong dapit nga nahisakopan sa parokya – ang GKK Sto. Nino- Sitio Sarro ug GKK San Isidro Sitio Dominguez sa Brgy. Manuel Guianga . Sa ilang panaw padulong sa mga GKK, dili lalim ang ilang agian nga dalan kay kini dili pa sementado ug lubak-lubak ang kalsada. Kinahanglan og usa ka heavy duty nga sakyanan aron lamang makaabot sa nahisgutan nga mga GKK. Tungod sa kalay-on ug kasubidaon sa maong lugar, makita na ang tibuok syudad ug ang Davao Gulf inig abot sa GKK. Bisan pa niini, aktibong mitubag ang mga partisipante sa mga pangutana sa konsultasyon, ug malipayon usab silang mipaambit sa ilang mga pagbati.

Nahimong mabungahon ang pre-synodal consultations sa mga nahisgotan nga mga GKK. Ilang napaambit ang ilang mga panan-aw o opinion ug ang ilang kalambigitan sa Simbahan. Gitambongan kin isa managlahing sector, duha niini ang mga uniformed personnel o mga sundalo. Matud pa ni Ednalyn M. Lascuna, usa ka miyembro sa GKK Santo Nino Sarro, ang simbahan dili lamang usa ka istruktura, apan kini mao ang katilingban nga nagkahiusa sa pagdayeg kang Kristo nga maoy pundasyon sa Simbahan.

Nasundan pa ang pagbisita sa team niadtong miaging Domingo, Nobiyembre 28, sa unang adlaw sa adbiyento. Usa ka layo nga GKK na usab ang gipaminaw sa team, ug kini ang GKK La Purisima Conception sa Brgy. Sirib. . Duol ang maong GKK sa Tribal Community sa maong Barangay, ug mitambong ug mipartisipar sa konsultasyon ang mga miyembro sa Bagobo Tribe. Dinasig sa Espiritu Santo, ang katawhan nga nanambong nakapaambit sa ilang panglantaw diha sa mga posibleng aktibidades sa mapadayonong misyon sa Simbahan, hilabina ang panglantaw sa grupo sa mga tribal community. Tukma sa panahon sa adbiyento ang ilang mga sharing kay kasagaran kining naghisgot sa papangandam sa kaugalingon diha sa pagserbisyo sa simbahan.

Madasigon ang pre-synodal team sa San Francisco de Asis Parish diha sa ilang misyon nga makaabot sa lagyo nga mga lugar aron mapaminawan ang perspektibo sa mga tawo mahitungod sa Simbahan, subay sa pagpangandam sa Synod of Bishops. Padayong naga-ampo ang miyembro sa SFDA Parish Pre-Synodal Team sa malampusong mga konsultasyon nga gilaumang mahuman sa Disyembre 4, 2021. (Jeffren Miguel | SFDA SocCom)