Parokya ni San Francisco sa Tibungco 56 anyos na

Gipangulohan ni Most Rev. George B. Rimando, D.D., auxiliary bishop of Davao, ang misa sa ika-56 nga kapistahan sa Parokya ni San Francisco Xavier sa Tibungco, Disyembre 3, 2021.

Sa iyang homiliya, gipahimangnuoan ni Bishop Rimando ang katawhan sa tulo ka kontektsto. Una, ang pagsaulog sa kapistahan nga mao ang pasalamat anaa sa panahon sa adbiyento, ang pagpaabot sa Ginoo. Ikaduha, ania usab kita sa pagsaulog sa ika-500 nga kasumaran sa Kristiyanismo sa Pilipinas. Ug ikatulo, ang pagpangandam sa Sinodo nga giablihan niadtong Oktubre.

Gihagit ni Bishop Rimando nga sama sa Maayong Balita nga nadungog sa Ebanghelyo nga ang mga buta nakakita, ang mga bakol nakalakaw, kita usab unta makakita kita nga si Kristo mao ang sentro sa atong kinabuhi taliwala sa kalisod niining pandemya. “Kanang kaikag sa pagtulon-an sa simbahan mao unta atong mabati,” matod pa ni Bishop Rimando. “Ang giwali ni San Francisco dili ang iyang kaugalingon, kondili si Hesus,” dugang niya.

Sa pagsaulog sa ika-500 katuig nga pagsaulog sa pagka-Kristiyanos sa Pilipinas, “dili mabulag ang pagpasalamat sa Dios sa mga misyonaryo nga nagdala sa Maayong Balita sa Ginoo,” pahinumdom sa Obispo. Sa kasinatian ni San Francisco, siya nakaabunyag og 3,000 ka mga bag-ong magtutoo ug kasagaran niini mga bata nga wala pa gani masayod sa ilang wala ug sa ilang tuong kamot.

Uban sa Kura Paroko nga si Fr. Proceso Gimeno, Jr., ang mga parokyano sa maong parokya gihagit nga ang pag-antos nato sa panahon sa COVID kumingking sa sa pag-antos ni San Francisco sa iyang misyon. Isip gigasahan aron mogasa, kitang tanan giawhag nga magpasalamaton sa daghan natong nadawat. Kini mahitabo kung ang paghatag og bili sa Eyukaristiya nga maoy naghatag og kalig-on ni San Francisco, kining Misa nga atong ginasaulog mao untay maghimo usab nato nga mamahimong gasa ngadto sa uban. (DCHerald)