Pagplano sa ika-50 katuig sa GKK sa Davao gisugdan

Sa milabay nga tigom sa mga kaparian sa Davao, kon Presbyterium meeting, giplano sa Arkidyosesis sa Davao nga saulogon ang ika-50 nga kasumaran sa GKK (Gagmay’ng Kristohanong Katilingban) karong umaabot nga Hunyo 2022. Kini itunong sa pagsaulog sa gitawag nga BEC Sunday, kon Domingo sa GKK atol usab sa pagsaulog sa liturhiya sa Santisima Trinidad.

Kini makahatag sa igong panahon sa pagpangandam sa paglambigit sa mga miyembro sa GKK, ilabina sa daghang maayong kalihukan sa kinabuhi ug pagtoong Kristohanon sa Arkidyosesis sa Davao. Kini usab makapahagit sa mga GSL (GKK Servant Leaders) nga makaplano usab sa mamahimong “video presentation” sa mga maayong gibansay diha sa GKK.

Sugyot sa mga pari nga han-ayon ang daghang mahimo sa pagpalanog niini mga pila ka bulan sa dili pa kining adlawa moabot. Gisugyot usab nga masubli dili lamang ang “evaluation” kondili ang paglantaw sa implementasyon sa gitawag nga Yellow Book, kon giya sa GKK sa Arkidyosesis sa Davao nga gipagula niadtong tuig 2014. Mamahimo usab nga iapil ang pagpamalandong sa bili sa “Stewardship” diha sa lihok sa GKK.

Kahinumdoman nga human sa gipahigayon dinhi sa Davao ang unang Mindanao-Sulu Pastoral Conference (MSPC) niadtong tuig 1971, ang pagpalig-on sa GKK mas nahatagan og bili. Sukad niadto, napalambo ang mga GKK diha sa daghang mga kalihukan nga liturhiyanhon ug sosyal uban sa mga kahuyang ug hagit nga giatubang niini.

Gilauman nga uban sa diwa sa “synodal Church” mamahimong lingkuran pa kini sa komitiba uban sa pagpangulo ni Fr. Pedro Lamata, Director sa GKK sa Arkidyosesis sa Davao ug Kura Paroko sa San Francisco de Asis Parish sa Laverna. Kini aron mas maplanohan pa ang makahuloganon nga paghigayon niining importanteng kasinatian sa kasaysayan sa Simbahan sa Davao. (DCH)