Pagbisita nga Nagdala sa Kalipay

Ika-upat nga Domingo sa Adbiyento (December 19, 2021)
Mi 5:1-4A / Ps 80:2-3, 15-16, 18-19 / Heb 10:5-10 / Lk 1:39-45

Nakasinati ka na ba nga sa atong pagbisita sa atong mga silingan o higala o mahal sa atong kinabuhi, nakahatag kanila og kalipay?

Nganong ang mga pagbisita ni Maria ngadto sa uban naka-palipay man? Niining katapusang Domingo sa Adbyento ang mga pagbasa nagdapit kanato sa pagpamalandong sa bulahang gasa sa gugma sa Dios- si Jesukristo.

Usbon ko ang pangutana, nganong ang pagbisita ni Maria kang Isabel, nagdala sa Kalipay? Kinsa may iyang gidala diha sa iyang sabakan? Iyang gidala ang tinubdan og tag-iya sa kalipay nga mao si Jesus. “Bulahan gayud si Maria sa tanang mga babaye!”tungod kay gipili siya sa Dios, mituo siya sa mensahe sa Ginoo, ug mituman sa iyang kabubut-on nga mahimong inahan sa atong Manunubos. Abli ug putli gayud ang iyang kasingkasing, busa malipayon siya sa pagdawat sa maong gasa ug pagsabak sa bunga sa grasya sa Dios.

Sa dihang nadawat niya ang tinubdan sa Kalipay nga si Jesus, iya kining gipaambit dayon ngadto sa uban-kang Isabel. Tungod niini ang iyang pagbisita kang Isabel naghatag sa kalipay ug nakaingon si Isabel, ”Kay pagkadungog ko sa imong pagpangumusta, miulpot sa kalipay ang bata nga akong gisabak”.

Kitang mga binunyagan nakadawat niining gasa. Kini nga gasa mao si Jesus sa diha nga misulod sa atong kasingkasing ang Espiritu Santo. Nahimo kitang “bulahan” kay nahiusa kita sa Anak sa Dios ug nahimong mga igsoon ni Cristo. Bulahan kay nahinloan kita sa mga sala diha sa Bunyag ug sa Sakarmento sa Pagpakig-uli. Bisan kon kita makasasala, si Jesus naghatag kanato sa grasya sa kaluoy ug pasaylo, aron mahi-uli ang atong relasyon ngadto sa Dios.

Sama kang Maria, dili nato angayang tipigan ang kalipay nga nadawat nato tungod sa gasa nga si Jesus. Sa atong pagpakiglambigit sa atong mga silingan, nag-mapahiyumon ba kita, nagpakita ba kita sa atong pagkamaabi-abihon kon hospitality. Mahigalaan ba kita niadtong sa atong tan-aw og paghukom ubos ra kanato. Gipasaylo ba nato ang mga nakasala kanato aron usab makita nato ang ilang pahiyum bunga sa atong pagpasaylo kanila.Papuy-a og paharia si Jesus sa atong mga kasingkasing aron dali ra nato ang pagsaksi sa iyang mga pulong ug buhat. Ipaambit si Jesus ngadto sa tanan, nga nagpasabot nga “dalha ang kalipay ngadto sa tanan. Mao kini ang mensahe karong panahona sa Adbyento. Amen.