Mama Maria

Dear KNOT

Maayong hapon. Ako si Ate Lourdes 65 ang pangidaron. Lourdes ang akong ngalan kay natawo ako Pebrero 11 kapistahan sa Birhen sa Lourdes. Akong mahinumduman nga sa kada Birthday nako mag novena gyud siya sa Birhen sa Lourdes. Tungod niini na inspire ako nga mu paambit sa akong kasinatian pinaagi sa programang Dear KNOT.

Akong mahinumduman nga sa gamayng bata pa ako, ang akong pagtoo nga kung mo sangpit ako sa ngalan sa Ginoo mamaayo ako. Kaniadto sa nag edad ako ug 9 anyos gikalintura ako niadtong higayona hinungdan nga naka absent ako sa eskwela. Grade 3 ako niadtong higayona.

Dear KNOT nisulod sa akong huna-huna nga mag Rosaryo nga arong ako mamaayo. Nagluhod ibabaw sa among katri atubangan sa among Altar. Ako ra usa niadtong higayuna kay ang akong Mama nanguha ug herbal nga itambal nako. Milabay ang adlaw naayo ako sa akong kalintura ug nibalik sa eskwela.

Sa akong High school days. Aron nga maka tungtung ug college kinahanglan nga mu take ug entrance exam, NCEE kon National College Entrance Examination. Ang akong gibuhat Dear KNOT, nag novena ako sa atong mahal nga Inahan sa kanunayng panabang o Mother of Perpetual help. Dako kaayo akong kalipay kay pasado ako sa score nga 86.5%.

Pipila lamang kini Dear KNOT nga mga kasinatian sa akong kinabuhi nga akong nabati ang presensiya sa GINOO bisan pa man sa akong malasaypon ug pagkamalapason sa kabubut-on sa GINOO.

Ang usa sa pinaka dili nako makalimtan nga trahedya sa akong kinabuhi niadtong tuig 2016 bulan sa Nobyembre. Nanguli mi sa Bohol alang sa ika 75th Bday sa among kamaguwangan. Duha mi sa akong igsoon. Didto nag abot-abot mi mga igsoon ug kaparyentehan. Nangaligo mi ug dagat aron kami magka bonding. Hunas ang dagat naidtong tungora so nagpalayo mi hangtud sa wala namo namatikdan mitaas na ang tubig. Nagtoo jud mi nga mangalumos na mi atong taknaa. Akong nahinumduman nga nagsuot ko ug escapular. Nisulod sa akong huna huna nga walay imposible sa Ginoo so nag ampo ako sa Our Lady of Mt. Caramel. Akong gihuptan ug wa nako buhii ang scapular. Gisalig ko ang tanan sa Ginoo kay nasayud ako nga siya ang gamhanan sa tanan. Sa sige nako ug sikad kay naunlod na ko adunay dakong bato nga akong nasikaran ug didto ako mipatong nalipay ako kay giluwas ako sa Ginoo. Gidungog ang aking pag ampo apan paglantaw ko sa dagat akong nakita ang akong igsoon, ig-agaw asawa sa akong ig-agaw naglutaw sa tubig ug wala nay kinabuhi. Ako ra gayud ang nakalingkawas niadtong panghitaboa.

Mao kadto Dear KNOT ang akong kasinatian. Mao nga sa kanunay nganha sa akong pag-ampo kanunay ang intercession ni Mama Mary with full of confidence and trust in the Lord. Karon ania ako buhi ug malipayon nga naga alagad sa among GKK ni St. JOHN PAUL II dinhi sa malagamot ug sa Divine Mercy Apostolate Devotee.

Salamat Kaayo Dear Knot sa hataas nakong sulat.

Daghang Salamat
Ate Lourdes

* * * * * *

Dear Ate Lourdes,

Praise and thank God for Mama Mary and her various miraculous intercessions in your life. Sa tinuod lang, usahay wala gyud kita makaamgo nga kung atong hunahunaon si Jesus, sa di kalayuan, kauban gyud si Mama Mary.

Kung atong mahinumduman, sa usa ka higayon niadtong Wedding at Cana, nagsulti ang atong Inahan kay Jesus…” They have no more wine”. Bisan dili pa unta panahon nga magperform ug milagro si Jesus, apan gituman gihapon Niya ang hangyo ni Mama Mary. Ing-ani ka kusgan ang atong Inahan. Busa, kung unsa ang atong mga hangyo, dili gyud kita magduha-duha og duol pinaagi sa pag pataliwala ni Mama Mary. Dugang pa niini, sa tiilan sa krus, ug sa mga pulong ni Jesus, “Woman, behold thy son”, Iyang gitugyan si Mama Mary sa atoa, nagpamatuod lang nga ato gyud siya nga Inahan.

Ang debosyon kay Mama Mary usa ka kasiguruhan nga naa kita kakampi sa atong kinabuhi ug dili gyud kita niya pakyason basta alang sa atong kaayuhan. Padayon lang sa imong makanunayong paghigugma kay Mama Mary. Sumala sa pag-ampo og MEMORARE, dili gyud kita niya biyaan nga walay pagtabang sa atong mga gihangyo kaniya. Aron ipakita kaniya ang hugot nga debosyon, hinumdomi kanunay ang paghalad kaniya og mga bulak, buhaton ang iyang mga gihangyo sa kadaiyang apparitions nga mao ang pag rosaryo adlaw adlaw. Importante sa tanan, isabwag gyud ang debosyon alang kay Mama Mary.

Live up to your name LOURDES and remember its significance. In addition, may you LIVE OUT Mama Mary’s message to all of us…to pray the ROSARY daily, and more importantly, imitate her virtues.

To Jesus, through Mary, may God bless you more.
Ate Emz