1st Communion alang sa mga Kabataan gipahigayon sa mga GKK

Gipahigayon ang tinuig nga first communion alang sa mga kabataan nga Grade 3 sa mga public schools nga nahisakop sa St. Mary of the Perpetual Rosary Parish Buhangin gipangulohan sa Parish Head Catechist nga si Mrs. Dionisia Devera kauban ang mga School Catechists.

Niadtong wala pay pandemya ginapahigayon kini sa mga eskwelahan una mahuman ang school year. Tungod sa nasinatiang pandemya karon gihimo kini sa unang higayon sa mga GKK chapels sugod kaniadtong Oktubre pinaagi sa orientation seminar sa mga kabataan hangtud niining bulan sa Disyembre.

Sa kasamtangan ubay-ubay ang mga kapilya nga naglunsad sa maong kalihukan. Adunay katilingban nga gipahigayon ang first communion nga eksklusibo sa ilang kapilya ug ang uban gihimo kini isip zonal nga aktibidades tungod kay nagadepende sa kadaghanon sa ihap sa mga bata ug sa kadako sa area sa maong host chapel aron ipatuman ang health protocols.

Sa napulo ka zona sa parokya adunay walo na ka mga zona ang nakahuman sa paghatag og first communion sa mga kabataan sa mga GKK nga nahisakop sa matag zona nga mikabat na og 385 ka mga kabataan: zone 1 (41), zone 3 (21), zone 4 (65), zone 6 (65), zone 7 (57), zone 8 (42), zone 9 (59), zone 10 (35). Ang laing duha ka zona naka eskedyul na sa umaabot nga bulan sa Enero.

Sa dili pa modawat ang mga kabataan sa unang pagkalawat, adunay orientation seminar nga ipahigayon diin kinahanglan motambong ang mga kabataan aron sila tudloan ug giyahan sa mga pangulo sa pagpanudlo o katekista sa mga GKK sa mga angay’ng buhaton panahon sa misa ug sa pagkumpisal. Dinhi niining seminar ipasabot sa mga kabataan ang ka mahinungdanon sa pagdawat sa Sakramento sa Pagkumpisal ug Sakramento sa Eyukaristiya.

Inigkahuman sa orientation seminar mosunod ang pagdawat sa Sakramento sa Pagkumpisal diin mismo ang Kura Paroko sa St. Mary of the Perpetual Rosary Parish nga si Rev. Fr. Dionisio C. Tabiliran ang moadto sa mga host chapel aron magpahigayon sa maong pagpakumpisal. Adunay mga kaparian usab nga motabang sa pagpakumpisal kung daghan ang ihap sa mga kabataan.

Pagkahuman sa kumpisal mosunod dayon ang Santos nga Misa alang mga First Communicants diin dinhi hingpit nga madawat sa mga kabataan ang Lawas ug Dugo ni Kristo sa unang higayon, pagabag-uhon usab ang ilang panaad sa bunyag.

Ang maong kalihukan aktibo usab nga gisuportahan ug gitambongan sa ilang mga ginikanan diin makita gayud ang ilang dakung kalipay sa maong selebrasyon.

Ang pagdawat niining mga sakramento usa ka lakang nga gihimo aron mas mahiduol ug mailhan sa mga kabataan si Kristo nga atong Ginoo. Mapasalamaton ang Kura Paroko sa St. Mary of the Perpetual Rosary Parish sa mga katekista sa ilang pagpaningkamot aron hingpit nga makadawat ang mga kabataan sa mga sakramento luyo sa nagpadayong pandemya.

Maingon nga nagmalampuson ang maong kalihukan ug sa kasamtangan padayon gihapon ang parokya ug grupo sa mga katekista sa pagpangimbita ug pagpangita sa mga kabataang gusto ug angay nang makadawat sa Sakramento sa Pagkumpisal ug Eyukaristiya. (Richie Lubon/Allyza Hope Tabigue, GKK SoCCom)