Pakiglambigit sa Kasumaran

Gikonselebrar ang Balaang Santos nga Misa sa St. Joseph the Worker Parish-Sta Cruz adlawng Biyernes, Nobyembre 5. Kini inubanan sa mga paring Diosesano ug laing pang kongregasyon nga nag alagad sa diosesis sa Digos ug gipanguluhan ni Most Rev. Bishop Guillermo Afable, DD.

Gisugdan ang liturhiya sa alas 9:30 sa buntag subay sa kasaulugan sa kasumaran sa Diocese of Digos.

Gipasidunggan ang duha ka Patron nga si San Jose ang Mamumuo ug San Isidro Labrador sa usa ka prosisyon padulong sa altar.

Sa sinugdanan gibasa ang orihinal nga diktito sa pagdeklarar sa pagkatukod sa Diocese of Digos nga sinulat sa Latin nga pinulungan ug ang english nga paghubad o salin niini sa Ingles.

Subay sa homiliya nga gipaambit sa atong Obispo ang usa sa hiyas sa atong pagkasimbahan mao ang PAKIGHIUSA.

“Managlahi man apan nahiusa sa gugma sa Diyos.”

Matod pa sa kanta, Kay Kita Usa ra sa Gugma ni Kristo: “Ang kahiusahan gilig-on sa PITO ka SAKRAMENTO sa atong simbahan.”

Usa sa dakong hagit sa panahon karon mao ang pag atake sa yawa sa atong kahiusahan. Tungod niini gipaningkamutan nga atong mabalik ug mapasalamatan ang kahiusahan nga taod-taod nang nagkawang.

Gipasabot usab ni Bishop Afable nga ang pagselebrar sa mga kapistahan ug mga annibersaryo sa mga kongregasasyon, grupo, dioceses ug simbahan tungod sa gugma sa Diyos ug ang kalipay sa kahiusahan.

Importanteng hiyas usab ang paghigugma dili lang sa Diyos apan sa isig katawo ug sa atong kaugalingon usab. Nagsugod kanunay ang paghigugma nga atong ginapaambit sa uban, gikan sa Diyos.

Sa katapusan ang atong kasumaran nagpahinungod sa padayong paglambo ug dugang pang pagkatukod sa atong pundasyon Pisikal man o Ispiritwal. Tungod kay “ang umaabot mas maayo pa.’ (Roy Carbajos | GKK Sto Nino Village | Sugid)