Miduyog kita sa samang pagpanaw

Ang St. Joseph Parish, Sasa, misalmot sa panawagan ni Archbishop Romulo Valles sa kinatibuk-ang lihok sa pagpangandam alang sa General Assembly sa Sinodo sa mga Obispo sa Oktubre 2023.

Niadtong Oktobre 17, 2021 mao ang pagbukas sa selebrasyon sa tanang simbahan ug miduyog usab ang Parokya uban ni Rev. Fr. Leonardo Dublan, Jr. (Fr. Bong) ang kura paroko ug ni Rev. Fr. Ramon Jamora nahitabo usab ang Sending Forth nila ni Ramel Pamplona, Beth Galarce, Mary Ann Averilla ug Amelita Desquitado. Human sa pagpasabot unsa kining Parish Pre-Synodal Consultation, gibati nga nanginahanglan pa og dugang membro aron pagtabang sa unang hugna sa synodal nga panaw, nga mao sila ni Ericka Suñer, Charisse Ferrarin, Susan Gerodias, Alfonsa Bongalo, Dario Medina, Helen Sayomac, Nancy Camporedondo ug Norman Gravino. Diha-diha namugna ang upat ka Team nga adunay tulo ka membro sa matag grupo.
Gikauyonan sa tanan nga bahinon sa duha ka pundok nga maoy modawat niini. Sa unang hugna mao ang External: pundok sa mga Strippers diha sa pantalan, mga Sabongero, Muslim, Barangay Functionaries ug Juvenile Gang members/Drugs dependent, ug hugna sa mga Internal: GKK members, Tigpasayon sa Pundok Banay, Beneficiares, Liturgical Ministries, ug Parish Recognized Center Organization (PARECO). Kini gitinguha nga dasigon kining maong mga hut-ong sa pag-apil sa proseso sa Sinodo, isip local nga kalihukan,nga unta matapos kini sa unang semana sa Disyembre 2021.

Ang konsultasyon sa Parokya gibase sa tema nga gikan sa Vatican ug sa upat ka mga pangutana nga giandam sa Synodal team sa Diocese ug himuon ang porma sa usa ka mubo nga survey sa gagmay nga mga grupo diha sa GKK, Face to Face o sa usa ka Zoom/hybrid nga panagtagbo alang niadtong giplano nga dunganon ang paghitabo sa konsultasyon sa walo ka zona.

Ug tuod man ang mga maabtikong nagalihok gisugdan dayon niadtong Nobembre 04 .upat ka grupo nakasinati na og duha o tulo sa mga pundok sa panagtigum. Sunod-sunod nga proseso sa pagpaminaw sa katawhan sa Dios. Isip usa ka pamilya sa Dios, nagapundok kon asa, magdapit ang Balaang Espiritu Santo, ug maglakaw nga nagka-uban.

Diin sa ilang pagpahigayon naka-amgo nga usa kini ka espirituhanon nga proseso. Dili kini mekanikal nga ehersisyo sa pagkolekta sa datos o serye sa mga debate. Ang pagpaminaw sa Senodo gitumong ngadto sa pag-ila. Dinhi nato makat-onan ug paggamit sa arte sa personal ug communal discernment. Maminaw diay kita sa usag-usa, mga pagpaambit sa pagtuo, sa mga timailhan aron masabtan nato kung unsa ang gisulti sa Dios niining pundok nga nagkatigum dinhi ug karon. Matud pa ni Fr. Bong dili kita maglecture, maghusga, magrespituhay kita ug unsay nadungog ug naobserbahan dili ipamalita sa uban.

Nadasig pod ang mga partisipante kay sila gipaminaw ug sila usab kabahin sa Simbahan. Ug dinhi pod nila masab-tan nga ang Ministeryo ni Hesus nagpakita kanato nga walay usa nga wala iapil sa plano sa Dios sa kaluwasan, ang tanan apil gyud diay.

Ang matag grupo nga nagalihok nanginahanglan usab sa mga pag-ampo ilabina gikan sa tanang nga GSL’s nga nakasabot ug bendisyon sa kaparian alang sa usa ka malampusong nga Sinado. (Amelita Desquitado, Soccom)