Kapistahan, Gipangandaman

Karong Nobyembre 27, 2021 mao ang ika-12 ka tuig sa pagsaulog sa kapistahan sa Our Lady of the Miraculous Medal Parish sa Indangan. Agi’g pagpangandam sa umaabot nga kalihukan ug usa sa mga highlights niini mao ang pagpahigayon sa “Sakramento sa Kompirma” diin mikabat ug 285 ka mga magtutuo 12 anyos pataas ang nakadawat sa maong Sakramento.

Ang mga kompirmante nagagikan sa nagkalain-laing GKK nga sakop sa maong parokya ug sa wala pa ipahitabo ang adlaw sa pagkompirma, adunay katekesis nga gipahigayon sa matag sona. Ang mga katekista pinanguluhan ni Mrs. Edith Mejos ang kasamtangang PSP coordinator miadto sa mga GKK nga naka skedyul sa maong seminar. Nahuman gayud ang pag catechize sa mga partisipante sa tibouk bulan sa Oktubre diin 7 ka sona ang nahatagan sa maong seminar.

Gipahigayon ang adlaw sa Kompirma niadtong Nobyembre 6, 2021 sa alas nuebe sa buntag nga gipanguluhan sa atong halangdon nga Arsobispo sa Dabaw, Bishop Romulo G. Valles. Kuyog usab sa maong obispo sila Monsegnor Jimmy Gamboa ug ang duha ka seminarista. Daku ang kalipay ug pasalamat ni Bishop Valles sa kura paruko nga si Fr. Jess Samaniego nga mipahigayon niini bisan pa man sa panahon karon nga adunay pandemya. Usab miingon ang obispo nga excited siya sa pag adto sa maong parokya tungod kay hapit na mahuman ang estruktura sa maong simbahan ug karon pa siya makakita niini.

Dugang pa sa iyang homiliya ang dakung kalipay nga iyang gibati kay buhi kaayo ang pagtoo sa maong parokya tungod sa gidaghanon sa nagpakompirma. Nanghinaut ang obispo nga kining pagtoo maoy mogiya ug ang balaang Espiritu Santo magpabilin nga lamdag sa tanan ilabi na ang bag-ong nakompirmahan nga katawhan. (Anabelle Encluna/Parish SoCCom)