Serbisyo, Aksyon sa Kabatan-onan

Isip usa ka Kristohanong batan-on, takos na sa kasing-kasing sa matag-usa ang pagserbisyo. Anaa ang kahinam nga mapadayag ang Maayong Balita sa tanang kabatan-onan diha sa pagbuhat ug kalihokan nga gi-ubanan ug espisipikong hilisgutan nga may kabahin sa panag-iya sa pag-ila sa kabatan-onan ug ang importansya sa pagsaulog sa ika-500 Years of Christianity. Tungod sa inisyatibo sa St. James the Apostle PYA Core Group nga gipangulohan sa Parish Youth Coordinator nga si Mark Obed Quintano ug sa nagkalain-lain nga Zone Coordinators nga sila Robert Casas Jr.(Zone 1), Honey May Rotersos(Zone 2), Rizamyl Balaquinto(Zone3), Apple Jean Cabatuan(Zone 4), Vanessa Calibod(Zone 5), Daniel Fritz Ayoso(Zone 6-a), Michelle Angela Sialmo(Zone 6-b), Kervy Sardido(Zone 7), og Jayson Culaba(Zone 8) nahitabo ang maong aktibidades inubanan sa pag-aproba sa Kura-Paroko nga si Rev. Fr. Rolando Mandreza, DCD. Ginatawag ang maong aktibidades nga GKK Hopping.

Ang usa sa tumong sa programa mao ang pagdani sa mga kabatan-onan bisan pa sa pagsubang sa mga kalisdanan taliwala ning nasinating pandemya.

Mao kini ang mga espesipikong hilisgutan sa nasulting programa.

DAYCA. Ang pagsabot sa organisasyon nga nangulo sa tanang kabatan-onan diri sa Archdiocese of Davao.

500 Years of Christianity. Pagahisgutan ang importansya sa pagselebra sa maong ika-lima ka gatos nga pagtoo isip usa ka Kristyano nga Pilipino.

Gisugdan kini atong September 12, 2021 og ginapahigayon kini matag Dominggo sa buntag. Isa ka zona matag Dominggo ang schedule sa maong aktibidad. Nagsugod sa Zone 8 nga gipartisipahan sa nagkalain-lain nga GKK, hangtod karun nagapadayon gihapon ang maong aktibidad. Gilauman nga mahuman kini sa ikaduhang semana sa Nobyembre.

Sa nagkalabay ang mga Dominggo, dako ang kalipay sa matag batan-on nga napahigayon ang maong aktibidad tungod mao kini ang pinakaunang kalihokan nga naaprobahan sukad mibuto ang pandemya. Isip us aka balos sa paghatag og oportunidad nga mapahigayon ang kalihokan, nagapaningkamot ang mga nangulo sa maong kalihokan nga musonod sa balod ug mosubay sa Health and Safety Protocols.

Inubanan sa panabang sa atong makakagahum nga Ginoong Jesukristo, nagalaum ang matag-usa nga kabahin sa maong aktibidad nga makakutlo ang tanang kabatan-onan ug madala kini sa tagsa-tagsang kinabuhi. (Mark Obed Quintano / SJAP PYA Coordinator)