Luyo sa pandemya, ika-44 nga kapistahan ni St. Jude makahuloganon

Luyo sa pandemya nga nasinati karon, ang Gagmay’ng Kristohanong Katilingban (GKK) sa St. Jude Thaddeus nga nahisakop sa Parokya sa St. Mary of the Perpetual Rosary Parish, Buhangin diin gisaulog ang ika-44 nga kapistahan sa Mahal nga Patron, St. Jude Thaddeus sa Oktubre 28, 2021 uban sa tema: “San Judas Tadeo: Modelo sa lig-ong pagtoo, maalagaron ug manggihatagon sa kaugalingon ngadto sa uban.”

Aron makahuluganon ang kasaulogan sa kapistahan sa Mahal nga Patron San Judas Tadeo, gisugdan ang pagpangandam sa katilingban sa pagpahigayon og siyam ka gabii nga nobena kasaulogan sugod Oktubre 19 hangtod Oktubre 27, 2021 sa alas 7:00 sa gabii diin adunay pag-ampo sa santos nga rosaryo sa dili pa magnobena kasaulogan.

Sa bisperas sa kapistahan, Oktubre 27, 2021 sa alas 4:00 sa hapon, adunay pagprusisyon sa imahe sa Mahal nga Patron St. Jude Thaddeus palibot sa nagkalain-laing dalan sa St. Jude. Pipila ka mga miembro sa katilingban nakig-uban sa prusisyon ug ang ubang mga miembro sa katilingban magpabilin sa ilang panimalay ug magsindi sa kandila inig agi sa Mahal nga Patron St. Jude Thaddeus.

Tungod sa pagpadayon sa pandemya, walay social activities nga gipahigayon panahon sa kapistahan tungod sa pagsunod sa mga health protocols. Busa, ang kasaulogan sa Santos nga Misa alang sa maong kapistahan ni San Judas Tadeo nagpahigayon niadtong Oktubre 28, 2021 sa alas 8:00 sa buntag sa St. Mary of the Perpetual Rosary Parish Church, Buhangin.

Pinaagi sa mga hiyas ni San Judas Tadeo, nga maoy modelo sa mga pangulo ug mga miyembro sa katilingban, nagapadayon gihapon sa pagpangalagad ang mga GKK Servant Leaders kauban ang mga miyembro diha sa pag-ampo sa rosaryo ug pagtambong sa kasaulogan sa pulong matag Sabado sa gabii bisan pa man taliwala sa mga pagsulay. Mapasalamaton kita nga gihatag si San Judas Tadeo aron nga kita maduol ngadto sa Dios. VIVA SAN JUDAS TADEO! (RL Flores Young, GKK SocCom)