Kasadya sa Parokya, Luyo sa Pandemya: San Miguel Parish Panacan’s 27th Parochial Fiesta

“Si San Miguel maoy giya, magtutudlo, ug mag-uuna,” kining linyaha mao gayud ang isa sa mga mutatak sa mga parokyano mahitungod gikan kini sa koro sa hataas nga Gozus alang kang Sr. San Miguel. Ug dinha, sama sa patrong Arkanghel nga madasigon ug maisog nga nakigbatok sa mga daotan, gisaulog ang iyahang ika-27 nga kapiyestahan sa Parokya sa Panacan niadtog Setyembre 29, uban sa temang – “Gasa sa Paghatag, Taliwala sa Katalagman, Ikaw Nagauban Latas sa Kalisdanan.”

“Pasayloa kami kung may kakulangan kaming mga pari… duol kamo sa among mga kasingkasing, mga kabatan-onan, salamat sa inyong pagpakiglambigit nga makanunayon sa inyong Parokya,” ang mga pulong nga emosyonal gayud nga gibuhian ni Rev. Msgr. Julius Rodulfa sa iyahang pagdumala sa Santos nga Misa niadtong alas-nuwebe sa buntag. Sa iyahang homiliya, nagibalik-lantaw siya sa maong giagian ug kasaysayan sa pagtukod sa Parokya hangtod karon. Ug nagpadayon ang mga lain pang Santos nga Misa nga gipasiugdahan ni Rev. Fr. Efren A. Gubac, Jr. D.C.D.

Gipahigayon usab ang pinakaunang Virtual Fiesta Celebration sa San Miguel Parish Panacan, diin ubay-ubay nga mga numero sa mga parokyano ang niapil sa maong pasundayag.

“Kasadya nga aduna puy kaisog, kay si San Miguel nga mao atong patron ang maong larawan niini… Kaisog alang sa pagpanalipod sa katawhan, alang sa kaayohan sa katilingban, alang sa kalamboan sa tanan – mao kini ang kaisog nga gikan sa Diyos,” mao kini ang mga pulong nga gihatagan og gimbug-aton sa mensahe sa pagpasalamat ni Most. Rev. Romulo G. Valles. D.D. nga maong nagpakita pud sa iyahang suporta ug pakig-uban sa maong selebrasyon.

Sa pagsaulog niining Socio-cultural celebration, gipahigayon usab ang pipila ka mga indayag na siyang giapilan sa nagkalain-laing mga ministriya, mga GSLs, ug labaw na sa mga parokyano ni Sr. San Miguel. Usa na dinha ang Divine Cosplay na diin gipakita sa matag ministriya ang ilahang talento sa pagsundog sa mga karakter nga gihatag kanila. Uban pud dinha ang Poster Making Contest nga nakaangkla sa tema sa kapeyestahan. Didto, gipakita sa mga batan-on sa Parokya ni Sr. San Miguel ang ilahang mga nagkadaiyang mga abilidad sa pagdibuho. Lakip niana, aduna pud Sing-Along Contest, SMPamilya Tiktok Contest, Raffle Draws, ug Guess the Photo Challenges nga gi-andam para sa pakigsaulog sa mga parokyano. Gipasundayag usab sa mga pinili nga mga batan-on gikan sa San Miguel Parish Youth Apostolate (SMPYA) ang ilahang mga tingog sa pagpahigayon sa Radio Drama nga nagahisgot sa kinabuhi sa maong patrong ginasaulog.

Pipila ka adlaw usab bago ang kapiyestahan, tiunay nga preparasyon ug abunda ka mga kalihokan ang gipahigayon. Usa dinha ang Brigada sa Parokya nga gipartisipahan sa nagkadaiyang mga ministriya. Ug ang Novena usab nga sa adlaw pagtapos niini, gipahigayon ang Caravan nga siyang limitado lang pud isip pagsunod usab sa mga protocol karong pandemya.

Sa kinatibuk-an, nagmalampuson ang pagsaulog sa selebrasyon sa kapeyestahan – sa Santos nga Misa ug sa Virtual Fiesta Celebration nga siyang gipreprarahan og pag-ayo sa Fiesta Committee nga gipangunahan sa Kura Paroko nga si Fr. Mervin George Maglana, D.C.D. ug sa iyahang assistant nga si Fr. Efren A. Gubac, Jr., D.C.D. (Ma. Joneila B. Laruya, SMPYA Soccom | Lit D. Diana, Parish Soccom)