Dios, Matuod nga Bahandi

Ika-28 nga Domingo sa Ordinaryong Panahon (October 10, 2021)
Wis 7:7-11 / Ps 90:12-13, 14-15, 16-17 / Heb 4:12-13 / Mk 10:17-30 Or Mk 10:17-27

Mga kaigsoonan ania na kita karon sa Ikakawhaag – walo nga semana sa ordinaryong panahon. Ang usa ka dato diha sa atong ebanghelyo nangutana kang Jesus kon unsay iyang kinahanglan nga buhaton aron madawat niya ang kinabuhing dayon. Ang maong pangutana naghambin ug lawom nga kahingawa sa pagpangita ug kahulogan sa iyang kinabuhi ug sa Dios nga maoy makahatag sa kinabuhing dayon.

Ang unang pagbasa diha sa kaalam ni Solomon naghisgot sa iyang pagkadawat sa kaalam nga iyang gipangayo ug gihatag sa Dios kaniya. Gani iya kining gimahal labaw sa tanan kaysa mga trono ug bahandi, bisan gani sa maayong panglawas. Si Solomon nakakaplag sa kaalam ug iya kining gihuptan diha sa iyang kaugalingon.

Dugang pa niana, ang atong ikaduhang pagbasa sa Sulat ngadto sa mga Hebreo nag-ingon nga ang Pulong sa Dios molagbas ngadto sa kinahiladman sa kalag ug mas hait pa kaysa duhay suwab nga espada. Kining maong paghulagway nagpakita lamang nga ang Pulong sa Dios labaw kaysa bisan unsang anaa niining kalibutan ug walay laing makasusi ug nasayod sa kahiladman sa tawo.

Ang tubag ni Jesus ngadto sa tawo, nganong naka-ingon ka man nga maayo ako, walay laing maayo gawas lamang sa Dios. Kining maong tubag ni Jesus nagdapit sa maong tawo diha sa atong ebanghelyo sa pagpalawom pa sa iyang pag-ila kang Jesus. Si Jesus nag-imbita sa pagsunod kaniya human unya sa paghatag sa iyang mga bahandi ngadto sa mga kabus. Kining maong lakang sa pagsunod kang Jesus nagkinahanglan ug pagbiya sa mga butang nga makapabalda sa pagsunod kaniya.

Ang gihuptan ug gimahal nga kaalam ni Solomon ug ang pulong sa Dios nga mas hait pa kaysa duhay suwab nga espada, nagpadayag ug nagpakita sa pagkatawo sa Anak sa Dios. Si Jesus mao ang Pulong sa Dios nga nahimong tawo ug ang kaalam nga naghimo sa kalibutan.

Kita sa atong kabahin, giimbitahan sama sa datong tawo diha sa atong ebanghelyo nga mosunod kaniya. Apan unsa kaha ang bahandi nga atong gihambin diha sa atong kinabuhi nga buot ipabiya ni Jesus kanato. Atong susihon diha sa atong kinahiladman kon unsa kining mga butanga nga naghatag kanato sa kalisod sa pagsunod sa mga lakang sa Dios. Ang mahigugmaon nga pagtutok ni Jesus kanato ang makatabang aron nga kita makakita diha sa paglantaw ug pagsusi sa atong tagsa-tagsa ka mga kaugalingon.

Ang grasya sa Dios maoy motabang kanato sa pag-usisa sa atong kaugalingon. Matod pa sa atong Ginoong Jesus nga kini dili mahimo sa tawo, apan mahimo sa Dios; kay ang tanan mahimo gayod sa Dios. Amen. (Sem. Soren Abellanosa)