Bulan sa Oktubre, Bulan sa Santos nga Rosaryo

Luyo sa pandemya, nagpadayon kita sa atong panaw uban sa atong mahal nga Inahan Birhen Maria. Matag bulan sa Oktubre, ginasaulog sa Simbahan ang bulan sa Santos na Rosaryo diin gidasig ang debosyon sa pag-ampo sa Santos nga Rosaryo ilabina diha sa panimalay kauban ang tibuok pamilya.

Bulan sa Marso, tuig 2020 atol sa pagsugod sa pandemya, gipanawagan sa atong mahal nga Arsobispo sa Davao – Most Rev. Romulo G. Valles, D.D. ang pag-ampo sa Santos nga Rosaryo sa matag panimalay kada alas otso sa gabii nga live sa Facebook page ug radyo sa DXGN 89. 9 Spirit FM – Davao ug kini nagpadayon hantod karon. Busa, niining Bulan sa Rosaryo, gi-awhag ang tanan ilabina ang matag pamilya, sa mapadayunon nga pag-ampo sa Santos nga Rosaryo ug panghangyo sa pangaliya sa atong mahal nga Inahan nga kita ubanan niining panahon sa kalisud. Ang atong Santos nga Rosaryo sa DXGN 89.9 Spirit FM panguluhan sa atong mga kabataan.

Sulod usab niining bulan sa Oktubre, ilunsad sa Davao Verbum Dei Media Foundation, Incorporated ang “Marian Art Exhibit” sa October 7, 2021 atol sa Kapistahan sa Mahal na Birhen sa Santo Rosario. Tuyo niining maong Marian Art Exhibit ang paghiusa sa mga Artist sa Mindanao ug panawagan og pinansyal nga supporta alang sa atong mapadayunong misyon sa ebanghelisasyon sa Davao Catholic Herald. Abri kani sa tanang Artist na gusto nga mahimong kabahin sa misyon. Pagaablihan ang registration sa October 7 pinaagi sa Facebook post sa Davao Catholic Herald – Official. Paghuman sa pagsumite sa mga Art Entries, magpahigayon og Bidding ug ang proceeds niini, mapadulong sa atong mga Artist ug Davao Catholic Herald. Nindut usab kini nga higayon nga mas mapaila pa sa creative nga paagi ang atong Mahal na Birhen Maria.

Naglaum kita nga pinaagi sa atong mga pag-ampo ug pagpaningkamut sa misyon, madasig usab ang uban sa pagpalambo sa ilang debosyon kang Santa Maria, atong Inahan sa Santos nga Rosaryo. (Mary Ann Almeria)