Birhen sa Peñafrancia: Inahan sa Grasya ug Kalooy

Gisaulog sa mga GKK servant leaders ug ang komunidad sa Our Lady of Peñafrancia GKK, DECA Tigatto, Buhangin, Davao City ang kafiestahan sa Our Lady of Peñafrancia niadtong Sabado, September 18, 2021 pinaagi sa Santos nga Misa nga gipanguluhan ni Rev. Fr. Armando Bacalso, Cavanis Fathers.

Sa iyang sermon, gisaysay ni Fr. Armando ang kasaysayan sa devocion sa Birhen sa Peñafrancia nga nagsugod sa usa ka lugar nga ginganlan “Peña de Francia” sa nasud sa Pransiya. Gi-awhag niya ang mga nisalmot sa Santos nga Misa nga sama sa semilya, kanunay kita maminaw ug atong ibutang sa huna-huna ug sa atong kasing-kasing ang Buhing Pulong sa Dios, ug kita maghinulsul sa atong mga sala ug mag bag-o pinaagi niini.

Pagkahuman sa Santos nga Misa, nag tapok-tapok ang mga GKK leaders ug ilang mga higala para sa simple nga salo-salo ug nagpahigayon ang mga kabatan-onan sa GKK ug mga online contest isip pasalamat sa Dios ug sa Mahal nga Virgen sa mga grasya nga ilang nadawat taliwala sa kalisod tungod sa pandemya.

Diri sa kapilya sa Our Lady of Peñafrancia GKK permanenteng gi-instalar ang opisyal nga replica sa Mahal na Poong Jesus Nazareno nga gikan pa sa Basilika Menor ng Itom nga Nazareno sa Quiapo, Maynila.