“Pagsunod kang Kristo”

Ika-24 nga Domingo sa Ordinaryong Panahon (Sept. 12, 2021)
Is 50:5-9 / Ps 116:1-2, 3-4, 5-6, 8-9 / Jas 2:14-18 / Mk 8:27-35

Ang atong mga pagbasa naghulagway sa unsa nga paagi ang sulogoon sa Dios mamahimong himayaon. Ang atong Ebanghelyo nagpunting kung unsaon pagsunod kang Kristo. Kinahanglan nga iyang ilimod ang iyang kaugalingon ug pas-anon niya ang iyang krus ug mosunod siya kang Kristo. Kini nga mga hulagway nagkahulogan nga ang atong kaugalingon kinahanglan nga maka-sentro kanunay kang Kristo.

Ang pagpangutana ni Jesus kung si kinsa man siya sumala sa mga tawo ug sumala kanila ug si Simon Pedro mitubag nga siya mao ang Kristo, apan wala mahuman didto ang pag-usisa sa iyang mga tinun-an. Tungod kay sa dihang misugod na siya sa pagpanudlo kanila nga “ang Anak sa Tawo isalikway sa mga punoan sa katawhan ug sa mga pangulong pari ug patyon siya. Kini nga paghulagway ni Jesus dili madawat sa tanan tungod kay giisip man nila nga si Jesus mao ang political nga manluluwas ug ila usab nga nasaksihan nga siya adunay gahom aron paglupig sa mga sundalo nga Romano.

Ang ilang pag-ila ni Jesus isip ilang magtutudlo, diha lamang sa taphaw nga pag-ila. Dili gayod kadtong atoa sa kinahiladman sa ilang tagsa-tagsa ka mga kasingkasing. Apan sa hinay-hinay nga pagpadayag ni Jesus kon si kinsa gayod siya, sila naka-ila sa hingpit og sa dihang ang Espiritu sa Dios mikunsad na diha kanila.

Mga kaigsuonan, ang atong pag-ila kang Kristo diha sa atong kinabuhi, kinahanglan nga aduna gayod kining tulo ka mga kalidad nga gipangayo sa atong Ginoo kon mosunod kita kaniya.

Una mao ang paglimod sa kaugalingon; diha sa atong mga kasinatian usahay makabantay kita nga nagpasulabi ang atong mga kaikag diha sa pagsunod sa atong mga gusto. Si Jesus mipahinumdom kanato nga kinahanglan kalimtan nato ang atong mga gusto og atong sundon ang gusto nga ipabuhat sa Dios kanato.

Ikaduha mao ang pagpas-an sa atong krus, ang atong kinabuhi isip usa ka Kristiyano – sumusunod ni Kristo gikinahanlan nga makamao kitang moatubang sa tanang matang sa hagit sa atong kinabuhi bisan kon kini nagkahulogan sa pagkutlo sa atong kinabuhi. Ang atong pagsunod sa mga tunob ni Jesus usa ka pagpadayag nga konkreto sa atong dakong gugma sa atong Ginoo. Kini gihulagway og gipamatud-an diha sa Ebanghelyo ni San Juan nga diin Jesus miingon nga “ang usa ka lugas nga trigo magpabilin nga usa ka lugas gawas kon itanom kini ug mamatay ug mamunga ug daghan.” Kini nga paghulagway sa atong Ginoo nagpunting ngadto sa iyang pagpasakit pagpakamatay ug pagkabanhaw aron kitang tanan mamunga ug daghan.

Ikatulo mao ang pagsunod sa atong Ginoo; kinahanglan nga magsunod gayod kita kanunay sa atong Ginoo dili kita mag-una kaniya. Ang pagbadlong ni Jesus kang Pedro sa pag-ingon “paluyo kanako, Satanas” ang hunahuna sa tawo mao lamang paghunahuna nga kalibutanon lamang ug dili ang hunahuna sa Dios. Atong ibutang kanunay ang Dios diha sa atong tagsa-tagsa ka atubangan ug atong sundon kon asa siya tungod kay mao lamang kini ang paagi nga makasulod kita sa Gingharian sa Dios nga iyang giandam kanato.

Mga kaigsoonan, kitang tanan adunay nahibal-an kung kinsa ang Dios. Parehas nga Dios, apan lain-laing mga imahe. Gusto ko kamong dapiton nga dad-on kini nga mga imahe ngadto sa pag-ampo ug pagpamalandong. Pangutan-on nato ang atong kaugalingon; Unsa man ang akong imahe sa Dios?