Ika-60 ka tuig nga kapistahan ni Birhen Dolorosa, gisaulog

Malipayon ug mapasalamatong gisaulog ang ika-60 ka tuig nga kapistahan ni BIRHEN DOLOROSA niadtong Setyembre 15, 2021 uban sa tema “60 Years of Blessings and Thanksgiving in Honor of Virgen Dolorosa”.

Nagkahiusa ang mga miyembro sa nagkalainlaing mga ministriya ug komitiba nga gipangunahan ni Rev. Fr. Ricky Penalosa, parish priest, uban sa Parish Youth Ministry ug Parish Finance Committee ang pagpangandam aron magmalampuson ang mga kalihokan, ug pagpahan-ay sa mga kinahanglanon niini, bisan tood sa kahimtang nga atong nasinati tungod sa Covid-19.

Gipahigayon ang zonal mass sa mga Barangay Gymnasium sulod sa 9 ka adlaw aron malikayan ang dinaghang panagtapok-tapok. May mga pari nga gi-imbitahan gikan sa laing parokya aron magsaulog sa Novena Masses nga gipahigayon sa simbahan.

Gipangunahan ni Abp. Romulo Valles, DD ang pontifical mass sa alas 9:00 sa buntag uban nila Rev. Fr. Salac, SVD ug Fr. Garcia, SVD. Gipahinumduman sa atong halangdong Arsobispo sa Davao ang katawhan sa Babak nga mag-amping ug magbinantayon kanunay tungod sa panahon nga atong natagamtaman.

Matod pa ni Bishop sa iyang pamalandog, “Ang tanan nga kapistahan sulod sa tuig 2021 nakaangkla sa selebrasyon sa 500 years of Christianity diin usab giselebrar ang ika-60 ka tuig sa kapistahan ni Birhen Dolorosa,” isip pagpasalamat sa mga grasyang nadawat bisan tood adunay pandemya.

Dugang pa ni bishop dili gyod nato kalimtan ang pag–ampo sa Ginoo sa panahon sa kalisod ug i-ampo pod ang ubang tawo labaw sa tanan ang katawhan sa tibook kalibutan pinaagi sa pangama ni Birhen Dolorosa.

Human sa santos nga Misa ug ginagmay nga pagsalosalo sa kumbento, gisunod dayon ang MARIAN VOYAGE sa alas 2:00 sa hapon diin gibiyahe ang Birhen Dolorosa sa unang higayon gikan sa parokya – BABAK WHARF – CALICLIC – VANISHING ISLAND sakay sa barge pagkahuman gibalik dayon sa parokya.

Duyog sa kasadya atol sa ika-60 ka tuig nga kapistahan nagpahigayon ug VIRTUAL HUDYAKA ALAY KAY BIRHEN DOLOROSA diin gilangkuban kini og mga presentasyon sa nagkadaiyang ministriya sa parokya.

Gipahigayon usab ang virtual awarding sa tanang nakadaog sa mga paindigay sa Poster Making, Cosplay, Song Composition, Tula para kay Maria ug Hi 5 Tiktok alay kay Maria.

Mapasalamaton si Rev. Fr. Ricky Penalosa, sa tanang katawhan sa Virgen Dolorosa Parish, ilabina sa mga GSL, GKKs, Center organizations ug ang Parish Youth Ministry nga gipangunahan ni Armel John B. Arellano nga maoy nagpahigayon sa mga kalihukan uban sa suporta sa Parish Finance Committee.

Bisan tuod sa kasamtangang kahimtang nga atong giatubang, sa kasakit ug kalipay… Birhen Dolorosa UBANI KAMI SA KANUNAY.

VIVA MARIA! VIVA BIRHEN DOLOROSA! (Junelda A. Jauod | VDP Parish SocCom)