Apektado apan lig-on ang pagtoo

Dear Ate Emz,

Usa ako ka Inahan dunay 2 ka anak. Akong panganay ulitawo na 20 anyos ug ang akong usa ka anak 10 anyos puro lalaki. Ang akong Bana dunay sakit, na mild stroke siya ug karon dili na kaayo makalihok kay tungod sa iyang kundisyon. Akong anak nga panganay karon ang naga pangita ug panginabuhian kay ako usa lamang ka housewife. Kaniadto sa maayo pa ang panglawas sa akong bana nakaluag-luag kay tungod duna siyay trabaho sa gobyerno apan karon medyo gibati na namo ang kalisod. Dili na igo ang mga benepisyo nga gikan sa akong Bana kay tungod lagi sa mga tambal maintenance nga iyang gikinahanglan nga aron mauli-an siya sa iyang kundisyon. Maayo na lang Dear KNOT kay ang akong anak nga panganay kugihan ug walay reklamo sa kung unsay anaa nga among nahiaguman sa pagka karon. Ang akong bunso nga 10 anyos maoy akong ka unong sa pag amuma sa akong Bana. Wala akoy problema sa akong mga anak kay tungod masaligan sila sa akong panginahanglan apan akong nabatyagan nga sila usab naguol pag-ayo tungod sa kundisyon sa ilang amahan. Dili ika limud nga sila usab apektado sa sitwasyon. Akoa na lang ipakita ang kaisug ug kakusog nganha sa akong mga anak nga aron dili sila mabalaka pag-ayo.

Dear KNOT manghinaut ko nga unta maulian na ang akong bana sa iyang kundisyon ug malampasan namo ang mga pagsulay.

Daghang salamat.

Linda

* * * * * *

Dear Linda,

Kitang tanan miagi gyud og nagkalainlaing mga pagsulay sa kinabuhi. Tinuod, masulub-on kita sa kahimtang sa imong bana karon. Apan sa pikas nga bahin niini naa pud ang kaakibat nga mga gasa. Sama sa inyong sitwasyon, naa sa maayong panglawas ang ubang miyembro sa pamilya. Naay trabaho ang imong kinamaguwangang anak bisan pa gamay ra ang sweldo. Matud pa nimo, responsable, kugihan ug dili sila pasaway nga mga anak. Timailhan lamang kini nga ang Ginoo nag-atiman dinha kaninyo ug angayang magpasalamaton sa Iyaha. Labaw sa tanan, ang gasa sa kinabuhi maoy pinakamahinungdanon, bisan pa naay mga kalisdanan nga ginaatubang. Tinuod dili gyud malikayan nga maapektuhan pud ang inyong mga anak sa kahimtang sa pamilya ilabi na sa kundisyon sa ilang amahan. Gani naningkamot pud sila nga makatabang aron mogaan ang gipas-an nga kalisud. Isip usa ka inahan medyo maluoy ka motan-aw sa imong mga anak nga nagalisod pud. Apan kini nga mga higayon mao ang makahatag og kalig-on, pagbati ug kalooy (compassion), pagpasensiya sa pagserbisyo, ug labaw sa tanan ang gugma maoy naghiusa dinha sa tibuok pamilya ug natagamtaman sa usa’g usa. Daghang pagtulun-an sa kinabuhi ang makutlo sa tanang kabahin sa inyong sitwasyon.

Naay usa ka pari, sa iyang pagpaambit sa pulong sa Ginoo, niingon nga ang mga KALIPAY nga atong masinati, mga HUNGHONG daw ni sa Ginoo. Sa laing bahin, ang mga KALISUD o KASAKIT mao daw ang mga SINGGIT gikan Niya. Ang kining mga pamaagi nagpahinumdum kanato nga naa lang gyud Siya kanunay sa atong kiliran, apan usahay dili nato nahibal-an ang Iyang presensya.

Taliwala sa tanang mga pagsulay, ang Ginoo nagpasalig nga ang mga gasa nga Iyang ipadala igo gyud sa inyong panginahanglan aron masagubang kini. (My grace is enough for you). Lakip na niini ang kaisug ug kakusog nga ginapakita nimo nganha sa inyong mga anak.

Itanyag sa Ginoo ang inyong tagsa-tagsang kasakit, kahasol, paningkamot, sakripisyo, ug uban pang mga kalisud. Pinaagi niini dili masayang ang tanan; hinuon, mahimo pa kini nga labaw mahinungdanon ug bililhon tungod kay gibayaw ug gihalad naman ninyo ang tanan dinha sa atong Amahang Makagagahum. Naa na kini mga merito aron mamahimo kamo nga takus modawat sa gugma ug kalooy sa atong Ginoo.

Salig lang sa Ginoo, kupti ang paglaom nga maulian ang maayong panglawas sa imong bana ug malampasan ra ninyo ang tanang mga pagsulay. Ang Ginoo mag-atiman gyud kaninyo. Sa tanang panahon nagalihok gyud Siya sa inyong kinabuhi, mahibalo ka man o dili. Bear this in mind…If your trials are deep seated and long standing, try kneeling.

God bless you more.

Ate Emz