“Ang Hagit Tubagon nga Malipayon”

Adunay daghang larawan sa gugma. Sama pananglit sa gugma ngadto sa Dios, gugma ngadto sa ginikanan, gugma ngadto sa mga higala, gugma ngadto sa uyab, ug uban pang matang sa gugma. Apan ang pangutana ni Fr. Ronald (Dodong) Arcillas ngadto kang Fr. Cris Alcayde ning programa “Bokasyon Bililhong Gasa” mao ang gugma ngadto sa uyab. Busa gitubag kini ni Fr. Cris sa pag-ingon: “Nakasinati man usab ako sa puppy love sa high school pa ako, sa binisaya pa ‘gugma sa itoy.’ Apan nagpatigbabaw ang akong gugma kang Jesus pinaagi sa pagpili ko sa bokasyon sa pagkapari.” Nagpabilin ang iyang desisyon nga magpari gayud siya, tungod kay mao kini ang sugyot sa iyang kasingkasing inubanan sa pagpamalandong ug pag-ampo. “Congratulations Fr. Cris!,” matud pa ni Fr. Dodong.

Mao kini ang usa sa mga gihisgutan sulod sa programa “Bokasyon Bililhong Gasa” diin nagsugod na pag-host ang atong bag-ong Director sa “Commission on Vocation”, nga si Fr. Ronald (Dodong) Arcillas. Ang unang bahin ning panaghisgot-hisgot mao ang pagtubag sa mga pangutana mahitungod sa mga pagbati ngadto sa iyang bisita nga si Fr. Cris Alcayde nga usa usab ka sakop ning bag-ong Komitiba. Matud pa ni Fr. Cris, iyang napamalandongan nga kining bag-ong sangon nga gihatag sa Arsobispo sa Davao nga si Arsobispo Romulo G. Valles, usa ka hagit sa iyang pagkapari. Hagit, tungod kay luyo sa iyang pagka-director sa DAYCA-Archdiocesan Youth Apostolate, anaa pa gayud siya sa seminaryo isip Spritual Director. Sa hamubo nga pagkasulti, milapad ang iyang responsabilidad sa katawhan. Mapasalamaton siya sa pagtamud sa iyang kapasidad bisan kon batan-on pa siya dili lamang isip persona kondili batan-on pa siya sa iyang pagka-pari. Gitapos niya kini pinaagi sa pag-ingon nga malipayong siya nga makahatag ug paglaum sa pag-palapnag sa tawag sa Dios ngadto sa kabataan. Apan nagpahinumdom usab siya sa mga tigpaminaw nga ang pag-promote sa bokasyon dili lamang buhat sa mga pari ug mga relihiyoso kondili alang sa tanang binunyagan.

Nahisgutan usab nila ang mga ginagmayng plano nga gipahigayon sa mga batan-on sa Parokya alang sa bulan sa Septembre, ilabi na kining gitawag og “Vocation Discernment” sa Parokya sa St. Francis Parish, didto sa Maa, karong September 18, diin adunay mga pagpaambit sa mga bisita mahitungod sa nagkalin-laing estado sa kinabuhi pinaagi sa ilang kasinatian. Mogamit sila sa social media o -Live streaming. Aduna usay Vocation Forum nga pagahimoon didto sa Mintal sa Parokya ni Fr. Jhonny Autida, matag Sabado sa bulan sa Septembre.