San Alfonso: Sumbanan sa Manggihatagong Katilingban

Malipayong gisaulog sa San Alfonso Ma. De Ligouri Parish ang ika-19 nga kapistahan sa patron niadtong Agosto 1, 2021 nga adunay tema “San Alfonso: Sumbanan sa Mangihatagong Katilingban”. Nagmalampuson ang maong selebrasyon bisan paman sa hulga sa Covid-19. Timaan nga ang pandemya dili babag sa pagsaulog sa mga parokyano sa kinabuhi ni San Alfonso Maria de Ligouri.

Si San Alfonso Maria de Ligouri sakop sa inilang banay, siya usab mao ang founder sa Congregation of the Most Holy Redeemer o Redemptorist. Usa siya ka kanhing abogado, pero tungod sa pagtoo iya kining gibiyaan ug nagpadayon sa iyang kinabuhi isip usa ka pari. Sa iyang pagkapari, nahimo siyang usa ka misyonero ug nakauban ang mga labing ubos. Dahilan nga gitawag siya og “Missionary of the Poor”. Ang maong titulo ni San Alfonso wala natapos sa iyang kamatayon kay kini nagpadayon hantod sa kasamtangan ug diri mismo sa parokya niya sa Mandug.

Ang tema sa karon nga kapistahan gikutlo sa personal nga experiensya sa parokya sa tawag sa pagkamanggihatagon sa mga parokyano ni San Alfonso sa Mandug ug bisan man mga dili niya parokyano. Dli ikalimod nga daghan kaayo ang mga kaigsoonan nato karon nga nagkinahanglan og labing panabang tungod sa atong nasinatian nga kalisod dala sa pandemya. Bisan paman niana wala kana mahimong babag aron makatabang kita sa atong mga kaigsoanan. Gitubag sa mga parokyano ni San Alfonso ang tawag nga mahimong usa ka misyonero sa mga labing ubos. Tungod kay ang parokya nakapahigayon og 2 ka dagkong gift giving activities nga inisyatibo sa kura paroko sa San Alfonso Parish nga mao si Rev Fr. Jemasol “Jojo” Ortiz kauban ang parish youth apostolate ug lectors, commentators, cantors, and psalmist o LCCP ministry sa parokya. Nakapang-apod-apod og 500 ka food packs alang sa 500 ka pamilya nga nagkinahanglan ang parokya, gawas pa niana ang halos 100 nga food packs nga naapod-apod usab sa pagsulod pa lamang sa tuig 2021. Ang tanan donasyon sa mga parokyano ni San Alfonso pobre man o dato, timaan nga ang pagtabang wala naglimita sa atong pinansyal nga estado.

Timaan usab sa pagkamanggihatagon ang pamilya nga midonar og 3.5 million pesos aron lamang mahuman ang ceiling sa simbahan, ug 400,000 pesos usab gikan sa lahing pamilya alang sa stone works sa altar sa simbahan. Hantod karon wala gayud magpa-ila ang mga maong mga pamilya simbolo sa ilang pagkamapaubsanon.

Pinasahi usab ang pagsaulog sa mga parokyano sa San Alfonso sa kapistahan sa patron kay tungod ang tanang mga kalingawan ug pa-contest gi-agi sa virtual activity nga mao ang hudyaka sa parokya: kalingawan luyo sa pandemya. Ang maong aktibidad gilangkuban og usa ka gamayng konsyerto nga gihalad sa Koro San Alfonso nga mao ang youth choir sa parokya ug mga contest sama sa cosplay of saints, poster making, vocal solo, ug ang trending karong mga panahona nga mao ang tiktok challenge. Aduna usab mga paraffle sa sulod sa virtual show. Gipalabas ang maong virtual show sa bisperas sa kapistahan ni San Alfonso, Hulyo 31 sa alas 8:00 sa kagabhion. Ang maong virtual activity inisyatibo sa parish youth apostolate pinangunahan sa youth coordinator nga si Jaycee Batchar. Miani ang maong aktibidad og mga positibong reaction sa tanang mga ning tan-aw sa maong virtual show.

Sa adlaw sa kapistahan, nagpahigayon og pagpamukaw ang kura paroko sa mga taga Mandug diha sa pag-mobile procession sa santo inubanan sa kusog nga tugtog sa gozos ni San Alfonso. Natapos ang pagpamukaw hapit alas 6:00 sa buntag nga gisundan dayon og santos nga misa. Ang fiesta mass, gisaulog sa alas 9:00 sa buntag nga gipanguluhan sa atong halangdong Arsobispo Romulo G. Valles, D.D. Sumala sa arsobispo nakurat gayud siya sa iyang pagbalik sa parokya nga nindot na kaayo ang ceiling ug hapit na mahuman ang simbahan tandi sa iyang kanhing pagbisita sa milabayng tuig 2019. Iyang gibalik ang pulong nga pagkamanggihatagon sa mga parokyano ni San Alfonso ug nagpasalamat kanila.

Sa katapusan nagpasalamat si Fr. Jojo Ortiz sa tanang mga indibidwal, mga ministriya, ug mga organisasyon nga minggahin og oras ug kahago ug tabang pinansyal aron mahimong magmalampuson ang pagsaulog sa ika-19 nga kapistahan ni San Alfonso Maria de Ligouri. (Jomar Earl Narciso | Social Communications Coordinator)