Pagpasaka sa Langit sa Mahal nga Birhen Maria

Solemnidad sa Pagsaka sa Langit sa Mahal nga Birhen Maria (August 15, 2021)
Rv 11:19 – 12:1-6, 10 / Ps 45:10, 11, 12, 16 / 1 Cor 15:20-27 / Lk 1:39-56

“Tungod sa mga dagkong butang nga gihimo Kanako sa Gamhanang Dios.” Ang mga pulong nga gikan sa “Magnificat” sa Mahal nga Birhen Maria. Kini siya naghisgot sa dakung pagtoo ug paglaum sa Israel. Nagpadayag kini sa Diosnong pagpadayon sa iyang gisaad nga kaluwasan. Usa kini ka pag-ampo sa Pasalamat ngadto sa Dios sa iyang pagluwas sa kalibutan nga nahisugamak sa sala. Kining kaluwasan natuman diha kang Cristo, nga sulugoong gisakit, nag-antus ug namatay, apan nabanhaw. Nahibaloan nato pinaagi ning pasalamat nga ang Dios nagpadayon sa pag-uban, pagbantay ug aktibong anaa sa taliwala sa kinabuhi sa iyang katawhan. Ang Dios tinuod gayud nga nakig-uban kanato ug alang kanato.

Ang ikaduhang punto ning atong kasaulogan karon nga mao ang pagpasaka sa Langit sa Mahal nga Birhen Maria, mao ang deklarasyon sa Santo Papa Pius the XII niadtong 1950: “Ang “Putling Inahan sa Dios human nagpuyo ning kalibutan, gipasaka lawas ug kalag didto sa langitnong himaya.” Apan ang atong gihinumdom karong atong pagsaulog mao ang mahimayaong kadaugan sa Mahal nga Birhen batok sa kamatayon ug ang iyang kahimayaan human sa iyang pagsaksi isip Inahan sa bugtong anak nga si Jesus. Nahibalo kita nga ang kamatayon mao ang resulta sa sala. Apan ang Mahal nga Birhen gihatagan sa dakung pribilihiyo nga makalingkawas sa sala. Mao kini ang kabubut-on sa Iyang anak nga si Jesus. Tungod sa dakung gugma ni Jesus sa iyang Inahan, nagbuot nga ang iyang lawas ug kalag mouban kaniya didto sa himaya nga mao ang langit.

Unsa may kamahinungdanon niining pagpasaka sa Mahal nga Birhen Maria sa langit sa atong kinabuhi? Kay haduol man siya kang Jesus, segurado gayud nga kon mahiduol usab kita ug magdeboto kaniya, maniguro usab siya nga makahangyo kang Jesus nga iuban usab kita ngadto sa himaya sa langit. Kon atong ibutang ang atong kaugalingon diha sa iyang paggiya kanato adlaw-adlaw, motabang gayud siya kanato. Mamalandong siya uban kanato. Mag-ampo siya uban kanato. Sa pag-alagad nato sa atong isigkatawo ubanan kita niya. Panalipdan kita niya, defensahan kita niya nga mahilayo sa pagsulay ug sa hinanaling kamatayon. Ug sa katapusan, mamahimo unta kitang susama sa atong Inahang Maria nga magmaampoon, mapasalamaton ug malipayon sa atong pagkinabuhi isip mga sumusunod ni Cristo. Pangayoon nato ang iyang panggama sa kanunay pinaagi sa pag-ampo sa Santos nga Rosaryo. Amen.