“O, Maria, Rayna sa Pilipinas”

Ang pagtoo sa Mahal nga Birheng Maria nga usa ka “Rayna” gisaulog sa tibook Simbahang Katoliko sukad pa sa milabay nga mga katuigan. Ang maong pag-ila sa Mahal nga Birhen nga usa ka Rayna gilagdaan niadtong 1954 ni Papa Pius XII nga gisaulog matag Mayo 31 apan gibalhin kini sa adlaw’ng Agosto 22 ni Papa Paulo VI, walo ka adlaw gikan sa pagsaulog sa Pagsaka sa Langit sa Birhen aron ipakita ang suod nga kalambigitan niini (Lumen Gentium, 59) diin ang Birhen, diha sa iyang pagsaka sa langit, “nagbisti sa adlaw, diha sa iyang tiil ang bulan, ug gikoronahan siya ug 12 ka bitoon” (Rebelasyon 12:1).

Ang pagkahimo ni Maria nga usa ka Rayna wala gibasi sa pagsubay sa iyang kagikan ngadto sa usa ka dungganong kaliwat sa mga hari ug hara, apan gipasikad kini sa iyang pagka-Inahan sa anak sa Diyos nga si Hesukristo (St. John Damascene). Ang iyang pagkahimong rayna pinasubay sa Balaang Kasulatan sa adlaw nga nagpakita kaniya ang anghel Gabriel aron pagpahibalo nga “manamkon ug manganak siya sa batang lalaki… ug ang Ginoong Diyos mohatag niya sa gingharian ni David…ug ang iyang paghari dili matapos” (Lucas 1: 32-33). Angayan lamang nga ang iyang pagka-inahan ni Hesukristo nga “hari sa tanang hari” nagahatag usab kaniya sa pasidungog nga “Inahan nga Rayna”. Kini gipasabot ni Papa Pius Xll (Ad Caeli Reginam) nga ang pagka-inahan ni Maria ngadto kang Hesus ug ang ilang kalambigitan sa usag-usa mao ang pag-ila kang Maria nga siya kabahin sa katumanan sa plano sa Ginoo nga mao ang kaluwasan sa tanan Niya’ng katawhan. Ang maong pagtoo (o dogma ug doktrina) gihan-ay ug gipasabot sa nagkadaiyang sulat apostolikanhon sa mga kaobispohan sa simbahan.

Ang pagtulon-an sa Katoliko nga Simbahan nagasaysay nga pinaagi sa pagpakigduyog ni Maria ngadto sa iyang anak nga si Hesus, ug sa iyang pagka-inahan kanatong katawhan sa Diyos mamahimo kitang iyang dalhon pinaagi sa iyang mga pag-ampo ngadto sa kabolahanan sa Diyos (Catechism of Catholic Church, 969). Si Santo Pius X nagkanayon nga ang Birheng Maria maoy “tukmang dalan diin mahiusa ang katawhan ngadto kang Kristo Hesus” (Ad diem illum). Susama kang Hesus sa harianong pag-alagad, si Maria usab nahimong Rayna sa pag-alagad pinaagi sa paghatag sa iyang kaugalingon nga mamahimong inahan sa Diyos, ug paghalad sa iyang anak ngadto sa krus alang sa katumanan sa kabubot-on sa Diyos (Papa Benedikto XVl).

Ang paghatag ug pasidungog o pag-debosyon kang Birhen Maria isip “Rayna” mikaylap sa tibook Simbahang Katolika tungod sa mga pagtulon-an niini sa mga santos ug kadagkoan sa simbahan nga kanunay nagapadayon sa dagan sa katuigan. Usa niini si Santo Papa Paulo II nga nag-awhag pinaagi sa iyang sulat apostolikanhon, Rosarium Virginis Mariae nga nagkanayon, “Among all devotions that which most consecrates and conforms a soul to our Lord is devotion to Mary.” Kun ato kining sabton, si Santo Paulo ll naga-awhag nga ang pag-debosyon sa Birhen Maria mao ang tim-os nga paghatag sa atong kaugalingon ug pagpahigayon sa atong kalag ngadto sa Diyos.

Pipila sa mga nagpasidungog kang Maria mao ang Pilipinhong Katoliko. Ang ilang paghatag sa ilang dakong debosyon sa Birhen gipadayag diha sa mga pag-ampo sa Santo Rosaryo, sa paghalad ug bulak sa iyang Imahan sa altar, sa pag-prosesyon sa iyang Imahin atol sa nagkadaiyang kapistahan niini, sa paghalad ug novena sa iyang ngalan, sa pagsangpit sa iyang ngalan panahon sa kakuyaw ug kapit-os, sa paghalad ug pag-ampo pasalamat sa mga grasya nga nadawat pinaagi sa iyang panabang sa pag-ampo. Bisan ang pagpangalan sa mga kapelya o Gagmay’ng Kristohanong Katilingban (GKK), ingon man sa mga dagkong simbahan o parokya, sa paghatag pasidungog sa iyang ngalan diha sa nagka-lainlaing programa o adbokasiya, ug ingon diha sa mga alawiton, tataw nga si Maria giila nga Reyna sa Pilipinas, nagaagak kanato ngadto sa Manluluwas nga si Kristo, iyang anak. (Cynthia Chu)