Mahimo Ka Bang Zombie?

Unsa ang imong mas labing gikahadlokan karon? Asa man ikaw gidala sa imong kahadlok karon?

Ang kahadlok ug kabalaka nga atong gibati karon niining panahon sa COVID-19 pandemya resulta sa atong pagkakulang sa atong pagtoo ngadto sa atong Dios. Ang kanunay nga atong ginaampo sa dili pa mahuman ang Santos nga Misa, ang Oratio Imperata, nga nangayo kita sa Dios nga hatagan kita sa pagtoo, mawala ang kahadlok batok sa sakit ug kamatayon ug iuli ang atong dakong paglaum. Kini nga mga pulong nga atong gibungat ngadto sa atong Dios. Mao ba gayod kini ang tinood nga atong gipangayo?

Ang trending kaayo nga nakapahadlok kanato mao ang atong kakulang sa kahibalo mahitungod niining nangabot nga mga bakuna. Matud pa sa mga social media posts, mamahimo daw kita nga mga Zombie, mamahimong mga miyembro sa 666, mahimong hamubo na lamang ang kinabuhi nga molungtad na lang sa duha katuig kung ugaling nagpabakuna ka. Dili kini talagsaon nga katingala diha kanato tungod isip tawo maantigo gayod kitang mosusi sa atong mga palibot.

Ang tawo gihatagan sa Dios ug dakong kahibalo tungod kay gihimo man siya sa kasamahan sa Dios. Ang tawo nga maoy maantigo gayod nga mogamit sa iyang kahibalo ug sa iyang kagawasnon. Apan dili usab nato hikalimtan nga kita adunay kaakuhan sa atong mga kaigsuonan. Kay mao usab kini ang sugo sa atong Ginoong Jesucristo nga atong higugmaon ang atong isig kaingon sama sa atong kaugalingon.

Tinood gayod nga aduna kitay responsibilidad sa atong isig kaingon kay ato man kini nga makita sa diha nga ang Ginoo nangutana kang Cain kon asa ang iyang igsuon nga si Abel. Ug ang atong Ginoo mismo maoy nagpalig-on niini sa dihang ang usa ka pareseo nangutana kaniya kon unsa ang labing dakong sugo, ug siya mitubag nga ang una mao nga atong higugmaon ang Dios labaw sa tanan ug ang ikaduha mao ang paghigugma sa atong mga igsuon sama sa atong kaugalingon.

Ang mga bakuna namugna tungod sa atong mga pag-ampo ug sayod kita nga ang Dios uban gayod, tungod kay diin aduna gani duha ug tulo nga nanagtigom sa iyang Ngalan anaa gayod siya uban kanila. Kita nga napulog pito na ka bulan nag-ampo sa atong Ginoong Dios nga hatagan kita sa bakuna pinaagi sa mga paggiya sa kahibalo sa mga experto sa siyensiya. Aron magamit nato batok niining hagit kanunay sa atong kinabuhi. Karon unsa man ang atong lihok batok niining mga realidad nga atong naatubang karon?

Ang atong tagsa-tagsa ka kaugalingon, himuon natong andam aron pinaagi sa gipadala kanato sa Dios nga mga bakuna mamahimo unta kini nga mga instrumento aron makapadayon na kita ngadto sa unahan. Ug ato usab nga pangayuon sa atong Dios nga hatagan kita sa grasya nga mas mosalig kita sa mga bakuna nga iyang gihatag kanato.

Himoon nato nga ang atong mga kaugalingon mahimong abli sa kanunay. Dili nato ipasulabi ang mga kahadlok ug kabalaka kay basin ug maghatod kini kanato sa dakong kapildihan. Kapildihan nga maghatod kanato ngadto sa pagka walay pagsalig sa Dios ug sa atong mga kaigsuonan. Dugang pa niana nga kita dili mga lumolupyo dinhi niining kalibutan kita usa ka dumuduong lang, kita mga lumupyo sa Gingharian nga diin si Cristo mismo ang nagpasalig niini. Si San Pablo diha sa iyang Sulat ngadto sa taga-Filipos, “Apan ang atong puloy-anan atua sa langit ug mahinangpon kitang nagpaabot sa pag-anhi sa atong Manunubos gikan sa langit- ang Ginoong Jesucristo.

Busa, alang sa imong kaugalingong kaayohan ug kaayohan sa tanan, PAGPABAKUNA NA! (Bro. Soren Abellanosa)