Gipili ang Tawo Tungod sa Kaayo sa Dios

Ika-21 nga Domingo sa Ordinaryong Panahon (August 22, 2021)
Jos 24:1-2, 15-17, 18 / Ps 34:2-3, 16-17, 18-19, 20-21, 22-23 / Eph 5:21-32 / Jn 6:60-69

Ang atong ebanghelyo karong adlawa naghatag kanato sa pagtulun-an mahitungod kang San Pedro. Una, gipili ni Jesus si Pedro aron mahimong pondasyon sa iyang Simbahan. Gihatagan niya siya ug autoridad sa pang-gamhanan, sa pagpanalipod sa Simbahan. Busa daku kaayo ang sangon sa pagkahimong piniyalan ug sa pag-adminstrador sa Iyang Simbahan. Busa mangutana kita nganong gipili man ni Jesus si Pedro?

Si Pedro gipili dili tungod kay aduna siyay superior nga kapasidad kaysa uban, apan kini tungod sa Diosnong gasa. Tungod kini sa kaayo sa Dios. Unya nahimong abli ang kasingkasing ni Pedro sa mga gasa sa Dios. Dali ra siya nakaamgo sa mga pamaagi ug sa kabubut-on sa Dios. Gihimo siyang pangulo sa Simbahan dili tungod kay daghan siya’g mga hiyas o virtud, o tungod sa iyang suludnong kusog, o hait nga salabutan, apan tungod kay mitoo si Jesus kaniya.

Sama sa gibuhat sa Dios kang Pedro, kita usab gitawag sa paghimo ug espesyal nga mga buhat alang kaniya. Ang Dios adunay plano alang kanato. Pinaagi sa grasya sa Dios, makabuhat kita ug daghang mga buhat alang sa gingharian sa Dios. Pinaagi sa iyang giya daghan ang atong mga buluhaton aron ang iyang plano sa kalibutan magmalampuson. Kitang tanan gitawag aron mobuhat ug maayo alang sa atong isigkatawo. Sama pananglit: Ang pagpasaylo nato sa mga nakasala kanato, sa mga mibiya kanato, sa mga nagsalikway kanato, sa mga nagdaut kanato. Sa pagsabot sa mga wala magpakabana sa atong panginahanglan niadtong nakasakit kanato. Nagtuo ang Dios sa atong kapasidad ug limitasyon.

Ang ikaduhang rason nganong gipili sa Dios si Pedro, mao ang iyang pagpadayag sa iyang pagtuo kang Jesus. Siya mismo ang midawat kang Jesus nga mao ang gisaad nga Manluluwas. “Nagatuo kami ug nasayod nga Ikaw man ang Balaan nga Dios.” Usa kini ka pagpamatuod nga gikan kini sa personal nga conviction ug personal nga pagdiskobre kang Jesus. Gikan kini sa iyang kasingkasing ug dili sa iyang pangisip lamang.

Busa sa atong bahin, dili kita magdula-dula uban sa mga pulong. Dili kita mag-imbento ug mga matam-is nga pulong aron lamang makapahimuot sa atong isigkatawo o mga labaw kanato, o magtumo-tumo aron lamang makapahimuot sa uban, apan layo diay sa kamatuoran. Dili kita magpala-pala o mogamit ug mga walay kamatuoran nga mga pagdayeg sa uban. Magmatinud-anon kita ug magmabinantayon sa atong mga pulong. Amen.