Ayaw pagbagulbol, tagamtama ang kaayo sa Ginoo

Ika-19 nga Domingo sa Ordinaryong Panahon (August 8, 2021)
1 Kgs 19:4-8 / Ps 34:2-3, 4-5, 6-7, 8-9 / Eph 4:30-5:2 / Jn 6:41-51

Unsa bay kasagaran nimong buhaton kung ikaw wala na makasabot sa kahimtang sa palibot? Di ba kaha ka masuko ug maningka sa uban? O di kaha gani ikaw moreklamo sa Dios ug mag-ampo nga mamatay na lang? Kung mahitabo kini angay natong hinumdoman ang mga pahimangno sa mga pagbasa karon.

Sa Ebanghelyo nadungog nato nga ang mga Judio nagbagulbol batok kang Hesus tungod kay siya miingon nga siya mao ang pan nga gikan sa langit. Dili sila makatuo kay wala sila makasabot. Diha lamang sa pag-ila nato sa Ginoo ug sa pagdawat kaniya sa dakong pagsalig bisan og usahay dili nato matugkad ang mga panghitabo, ato nga maangkon ang kalinaw sa kasing-kasing. Busa ayaw pagbagulbol kay ang Ginoo maatimanon kanato nga iyang gipangga.

Si San Pablo, sa ikaduhang pagbasa, nagpahimangno nga likayan ang kayugot, kapungot, kasuko, pagsiningkahay ug pag-insultohay. Hinunoa, makaloy-anay, magmalumo sa usag usa ug magpinasayloay sama nga kita gipasaylo na diha kang Kristo. Walay kitay makuha nga kaayo kung magpadala kita sa kainit sa ulo, ilabina sa mga panahon nga naglisod kita. Makatabang hinuon ang pagkalma sa kaugalingon ug pagsinabtanay aron magtinabangay aron magaanan ang mga gipas-an.

Si Elias, diha sa unang pagbasa nag-ampo nga mamatay na lang unta siya tungod sa kalisod nga iyang nasinati. Apan gipadad-an siyag pagkaon ug mainom sa Ginoo pinaagi sa anghel aron siya makalahutay sa iyang panaw. Nagtoo kita usahay nga gibiyaan kita sa Dios diha sa panahon sa kalisod, apan wala nato damha nga usahay ang mga paagi sa Ginoo diha lamang sa hilom ug dili usahay tataw. Apan kung unta kita mosalig lamang ug dili malimot nga ang Dios nagahatag sa atong panginahanglan, mosunod lamang kita kaniya ug mobuhat sa makaya kay ang tanan iya ra nga ipahiluna.

Busa, niining panahon sa pandemya ug krisis, likayan ta ang pagbagulbol. Salig lamang sa Dios kay siya nagapanaw uban sa atong kalisod ug dad-on kita niya sa kinabuhing haruhay. Tagamtama hinuon ang iyang kaayo.