Paninguha Taliwala sa Pandemya

Usa ka kasinatian panahon niining pandemya ang gisaysay sa usa ka estudyante nga nagmalampuson sa iyang tinguha nga maka-gradwar sa Senior High School pinaagi sa iyang paningkamot ug pagsalig sa Ginoo. Sa pagsaysay ni James Michael Roquero Milan:

Nagpuyo ko diri sa dakbayan sa Davao. Ang akong edad beinte uno anyos, ikatulo sa upat ka managsuon. Nakahuman sa Senior High School sa Assumption College of Davao batch 2020. Una ko nisulod sa SHS unit nagtrabaho ko as Freelance Event Coordinator sa Event Industry sa siyudad. Dako kaayo ko og kalipay kay makagunit nako og kwarta na akong gihagu-an aron maka tabang sa akong adlaw-adlaw nga allowance ug maka bayad sa tuition fee.

Pagsulod sa Covid-19 last March 2020, nawad-an ko og trabaho kay naundang ang tanang event. Tungod niini, nag-apply ko og trabaho sa online ug walk-in application sa BPO (Call center), pero wala koy swerte sa tanan nakong gi-applayan. Morag nawala na jud akong paglaum. ‘Asa man jud ko mangita ani? Unsa man jud akong buhaton?’ Mao kini ang mga pangutana nako sa akong kaugalingon.

Naa koy isa ka higala. Gi-share nako akong problema nga nangita ko og trabaho. Unya miingon siya, ‘ayaw walaa ang imong paglaum, kay ang Ginoo naay ihatag sa imoha sa tamang panahon.’ Didto ko nakamatngon nga tama diay siya – nga sa tanan nga atong gipangayo, dapat jud diay maghulat ta bisan naglisod. Just pray and wait! Sige ko og ampo nga hatagan na unta ko sa Ginoo og trabaho kung asa ko pwede nga haum sa akong personalidad. Ug naay niabot sa ako nga offer sa akong papa, kinsa usa ka mechanic, tapos kinahanglan niya og helper aron mag-ayo og sakyanan sama sa makina, ligid ug uban pa. Bisan hugaw siya, pero laban para makakwarta. Mapasalamaton kaayo ko sa Ginoo kay gitubag niya akong dugay na nga pag-ampo Kaniya. Bisan init kini nga trabaho ug hago, pero magsakripisyo kay dli sayon mangita og kwarta.

Nagpasalamat ako sa Dios ug mas labaw nga gihigugma nako Siya. Kay sa tanan nakong naagi-an sa kinabuhi, naa Siya sa akong kiliran kanunay ug wala gayud Siya nawala bisan daghan ang akong mga pangutana ug mga problema. Anaa Siya nga mutobag sa akong mga pag-ampo. Bisan kon adunay nasira nga pultahan, apan aduna puy laing maabli nga pultahan alang sa atong bag-ong kasinatian. Niining panahona nga adunay Covid-19, diri masulay ang atong pagtuo kung asa taman ang atong pagsalig ug pagmahal sa Dios. Kung nasinatian nato karon ang ‘dark situation’, gihatagan gihapon ta sa Dios og kahayag, paglaum, oportunidad, pasiyensya ug gugma. Nakit-an ug nasabtan nako ang gugma sa Dios pinaagi sa Iyang pag-uban kanako sa kalisod karong panahona. Kay grabe gayud ang pagsulay ug dili lalim ang kahadlok nga atubangon kung walay pag uban sa Dios – diin anaa kanunay ang panalangin sa Dios ug matag-adlaw nga mga pagsulay sa kinabuhi. “One hundred percent to trust God in the light is nothing, but trust Him in the dark, that is faith.” (Preny Alinsub)

(Si Preny Alinsub usa ka miyembro ug coordinator sa Couples for Christ – South Cluster Pastoral Formation. Usa usab siya ka lector, commentator ug SocCom sa St. Mary of the Perpetual Rosary Parish.)