Mga Layko Gitawag sa Misyon

Ning tuiga sa ika-500 ka Tuig sa Kristyanismo sa Pilipinas, kansang tema mao ang Gigasahan sa Paghatag, gitawag ang tanang mga binunyagan alang sa pagsangyaw sa Maayong Balita ngadto sa uban, gidawat kini isip usa ka Misyon. Mao kini ang gipahitabo sa usa ka pundok sa mga layko, ang Fil-Mission Auxiliary Association (FMAA), ang layko nga pundok sa Mission Society of the Philippines (MSP) nga natukod sukad pa niadtong tuig 1965. Sa pagkakaron, duna nay 80 ka mga pari ang gipadala sa nagkalainlaing dapit sa gawas sa nasud isip pasalamat sa simbahan sa Piliinas ngadto sa Diyos sa gasa sa pagtoo nga nadawat gikan sa mga langyaw nga mga misyonaryo usab.

Gilangkuban ang FMAA sa kababayen-an ug kalalaken-an kinsa nag-edad ug 25 anyos pataas, kinsa nagtinguha nga mamahimong kabahin sa misyon sa MSP. Usa kini ka nasudnon nga kapunungan nga nagdusu sa kahimatngon sa pagka-misyonaryo sa ilang tagsa-tagssa ka mga parokya ug mga dayosesis.

Unang natisok ang binhi sa pagtabang sa misyon dinhi sa Arkidayosis sa Dabaw niadtong tuig 1998 sa dihang nahimamat sa us aka layko ang usa ka seminarista sa MSP didto sa kauluhan.

Gisaysay ni Mila Punsalan, sa programang Tingog sa Layko sa DXGN 89.9 Spirit FM niadtong Hulyo 10, 2021, nga nagsugod ang kapunungan isip Friends of MSP. “Si Fr. Pete Mesiona, siya gayud na magbuhat ug association nga magtabang sa MSP, so mao na ni karon,” si Punsalan nagkanayon, “(ang seminarista) kay taga Kaputian siya ug nianhi siya sa Dabaw ug mibisita sa among upisina (sa NIA) diin duna pud mi ‘NIA LIVING WATER PAYER COMMUNITY’ ug didto na nagsugod ang maong pakiglambigit sa MSP.” SA pagkakaron, gidawat ni Punsalan ang katungdanan isip Archdiocesan Coordinator alang sa FMAA.

Samtang sa iyang kabahin, si Dr. Elly Acosta, kinsa karon mao ang Regional Secretary alang sa Mindanao sa FMAA, nagsaysay nga una niyang nakita ang mga sakop sa FMAA sa ilang parokya sa Imakulada Konsepsyon sa Mintal. “Nadani ako sa ilang prayer life, yung having the holy hour every month,” namahayag si Dr. Acosta, sanglit na-expose siya sa mga misyonaryo sa Cotabato nga mga Oblates of Mary Immaculate (OMI) ug nagtungha sa Katoliko nga mga tulunghaan.

Busa wala siya nagduha-duha sa pag-apil sa Basic Mission Orientation Seminar nga maoy unang ang-ang nga mamahimong sakop sa FMAA.

Busa ning taliabot nga Fil-Mission Sunday Hulyo 25, 2021, nangandam na ang mga sakop sa FMAA sa pagbisita sa mga parokya gikan Hulyo 11, 2021.

Atol sa pagbisita sa parokya, usa ka seminarista ang maghatag ug hamubo nga pakigpulong kalabot sa MSP ug sa pagkampanya ug suporta kanila pinaagi sa pag-ampo, paghatag ug dugang bokasyon, ug ang suportang pinansiyal.

Sa pagkakaron, daghan na usab ang natukod nga FMAA diin anaa ang kaparian sa MSP nga nag misyon sama sa: South Korea, ug New Zealand. Gilauman nga makaabot usab ang maong kapuniongan sa mga layko nga mag misyon sa Estados Unidos ug Inglatera.