Malampuson nga Hubileyo sa mga Liturgical Ministers sa Parokya sa Divine Mercy

Gisaulog sa Parokya sa Divine Mercy ang Jubilee sa mga Liturgical Ministers niadtong Hunyo 26, 2021 sa alas otso sa buntag, kauban ang mga ministriya sa Bible Apostolate ug Usherettes. Una kining gisaulog niadtong Hunyo 19, 2021 kauban ang mga ministriya sa Kaabag, mga Choir ug Altar Servers sa maong parokya.

Ang Misa gipangunahan ni Rev. Fr. Darwey P. Clark, DCM, kinsa nagpahinumdum sa matag usa sa iyang homiliya kon unsa sila ka bulahan nga makaalagad sa Dios ug makapaambit sa gasa sa pagtuo ngadto sa uban. Gidayeg usab ni Fr. Clark ang mga kabatan-onan nga nag-alagad isip Usherettes o Gift Gatherers tungod sa ilang dili matarog nga pasalig ug mapaubsanon nga serbisyo, labi na sa panahon sa pandemiya.

Sa wala pa natapos ang Misa, gipanghatag ang mga sertipiko sa mga Lector kinsa matinud-anon nga nagtuman sa ilang katungdanan nga gisalig kanila sa Simbahan sa sobra sa napulo ka tuig ug lakip usab ang mga kaabag kinsa nanerbisyo sugod pa kaniadtong tuig 2006, diin mao usab ang tuig sa pagkatukod sa parokya

Human sa Misa, adunay hamubo na programa ug miting nga gipahigayon sa Lay Formation Center kauban ang mga coordinators ug mga opisyales sa matag sona.

Ang pagselebrar sa maong Hubileyo sa mga Liturgical Ministers gi-skedyul ug gibahin-bahin aron sa pagsunod sa mga Health and Safety Protocols ug masunod usab ang kapasidad sa lingkuranan sa Simbahan. (Camille Apares / SocCom sa Parokya sa Divine Mercy, Diocese of Mati)