Grasya sa Disgrasya

Dako ang iyang kahibulong dihang nakita niya ang metal plate sa x-ray – ang porma sa krus sa tubo o steel nga gibutang sa sulod sa iyang bukog.

“Ang misyon nga gihatag kanako mao ang misyon nga ipalambo o ipahayag ang pagtuo sa Ginoo pinaagi sa arts, religious arts or inspirational arts.” Mao kini ang giingon ni Glenn Remolador kinsa nagtrabaho sa Muzic’s Kool isip School Administrator ug nagatudlo usab og Art Class. Graduate si Glenn sa Bachelor of Science in Accountancy ug siya ang Cartoonist sa Davao Catholic Herald.

Sa saysay ni Glenn, siya nagkanayon nga Grade 1 palang siya, nadiskobrehan na nga naa siyay talento sa pagdebuho o pagdrawing. Gipaapil siya sa iyang mama, kinsa usa ka maestra, og contest sa drawing. “Naay gipasundog sa akoa nga drawing ug akua kining gi-draw. Didto nako nadiskobre nga kabalo diay ko magdrawing”, saysay ni Glenn. Samtang ang iyang iyaan nakamatikod niining maong talento, ginatagaan si Glenn niini og mga gamit sama sa watercolor aron mapadayon ang iyang talento. Sa ilang skwelahan, sa Magallanes Elementary School, naga-apil si Glenn sa mga art competition batok sa ubang mga skwelahan. Sa linghod nga pangidaron, hilig niya ang magdebuho og robot made of carton.

Pangandoy ni Glenn sa una nga mamahimong engineer. Sa pamilya, ang iyang mga magulang maayo usab nga magdrawing. “Akoang ate hilig magdrawing og tawo, akoang kuya mga balay, ug ako mga landscape, seascape ug still life. Nadiskobrihan pud nako nga akong papa pud diay hawd magdrawing”, matod pa ni Glenn. Wala na kaayo moapil si Glenn sa mga contest samtang anaa na siya sa kolehiyo tungod kay lahi man kini sa iyang kurso. Pero sa ilahang balay, matag summer, usahay nagadrawing siya. Mibalik ang iyang gana sa drawing ug painting samtang nagtrabaho na siya sa tuig 2008. Ug nabuhi kini pagmaayo dihang gi-agni siya sa iyang classmate sa Elementary nga mag-exhibit. Miyembro na sa Art Group ang iyang classmate niadtong panahona. Gipahigayon ang Exhibit sa Gmall, human sa SM Lanang, sa Abreeza ug sa Holy Cross Art Gallery. “Namember ko sa Hikot Hungihong Collaborative Art Collectives pinaagi sa akoang higala nga nag-imbita sa akoa sa exhibit. Then akua pang gi hone akuang talento sa pag enroll ug art workshop kay Victor Secuya. Didto nahibaloan nako ang basic drawing and painting technique,” saysay ni Glenn.

Tuig 2012 miadto si Glenn sa Manila aron magtan-aw og mga artworks sa museum. Miadto siya sa Ayala Museum ug museums sa Intramuros. “Basta mutravel ko mangita gyud ko og art museums” dungag ni Glenn.

Tuig 2013 nagresign si Glenn sa iyang trabaho sa bangko aron pagduso sa iyang pasyon sa painting. Tuig 2015 nibalik siya pagtrabaho sa auditing firm pero ang pasyon sa painting nagpadayon. Gisaysay ni Glenn nga sa sugod, ang iyang painting mao ang mga work ni Ephraim Samson, watercolorist, diin maoy ganahan niya kaniadto kay watercolor ang iyang gamit. “Pero tung nagfull time ko as an artist, nagshift ko to acrylic then still life, landscape, seascape ang akoang mga subjects,” matod pa ni Glenn. Ang religious arts naabot niya thru commissioned artworks, inspired by the works of Da Vinci, Michaelangelo. “More of my works daw are vivid ang colors, lively and medyo naay pagkarealism but not hyper realism. Tapos, nahone pud siguro tungod nag-study pud ko kay nagatudlo ko og Arts sa Muzic School, nga mao akuang employer since 2016 until now,” dungag pa niya

Unang higayon ni Glenn nga magtudlo sa Arts sa dihang nag full time siya isip artist. Ulahi nang na tun-an ni Glenn ang Abstract. Nagikan ang maong inspirasyon pinaagi sa iyang mga pamalandong human siya madisgrasya. Diri na usab nagsugod ang iyang talento sa portraitures ug caricatures. Nadisgrasya si Glenn sa bike last December diin naghatod kaniya sa femur fracture. Gioperahan siya ug gibutangan og tubo ang sulod sa iyang bukog. Ang maong tubo o steel, nga nakita ni Gleen sa x-ray, naporma kini nga krus ug ginatawag kini niya og “cruciform”. “Akoang inspiration to draw abstract thru my painful yet learning experience kay pinaagi sa Lenten Recollection sa amoang community. The title is my cruciform life. Cruciform – naa syay agony pero naa pud syay hope or resurrection.” matod pa ni Glenn. Nakita ni Glenn nga makapamalandong siya habang nagapaint og religious art. “It could be a form of prayer while you paint religious art. Dako pud ang influence sa akoa nga nahimong cartoonist sa Herald when it comes to my religious art. Most of my works sa Herald are about religion – Mary, bible scenes, etc.,” dungag pa niya. Alang kang Glenn, dako og kalambigitan ang iyang faith o pagtuo sa iyahang art. Siya nagkanayon, “Religious art man gud is an expression of my faith to God. Akoang pagtuo mao ang nakapadasig kanado sa pagbuhat og religious art. It is also a way of prayer, recalling God’s works and miracles, some scenes I draw give glory to God, an expression of how grateful am I because God gave me talent in order to glorify His name.” (Bro. Junel Bustamante)