Food Bank For Our Brothers & Sisters Gilunsad

Ang parokya ni San Miguel dinhi sa Panacan, nagsaulog sa ika-27 nga Founding Anniversary niadtong Hunyo 20, 2021. Atol sa maong kasaulugan, diin mao usab ang Father’s Day, gilunsad usab sa parokya ang programa nga “Food Bank For our Brothers & Sisters”.

Ang maong programa unang namugna dinhi sa parokya ni San Miguel Arkangel sa Panacan pinaagi sa inisyatiba ug paningkamot sa among bag-ong Kura Paroko nga si Rev. Fr. Mervin George A. Maglana, DCD. Bisan pa sa mga pagsulay nga natagamtaman niya sukad sa iyang pagkadestino sa maong parokya, siya nagmalahutayon ug nagmalig-on isip bag-ong pari dinhi sa San Miguel. Dako kaayo ang iyang pag pasalamat ngadto sa mga parokyano tungod sa ilang pagkamangihatagon ug pagkamatinabangon sa maong programa. Busa dako kaayo ang iyang pagtoo nga magmalampuson kini.

Ang pagtukod nianing maong programa dako kaayo’g ikatabang sa mga kaigsoonan nga walay kapasidad o sarang nga ikapalit og pagkaon ning panahon sa pandemya, ilabi na atong mga kaigsoonang indigents. Nahimo kini alang sa atong misyon sa pagtabang sa mga kaigsoonan nga labaw nga nanginahanglan. Si Fr. Maglana nanghinaot nga taliwala niining pandemya sa Covid-19 magmakanunayon unta ang mga parokyano nga mosuporta sa mga programa ug mga panginahanglan sa
Simbahan.

Dako usab ang gibating kalipay ug pasalamat sa mga miyembro sa Parish Consultative Council (PCC), PSAM-Caritas, Parish Staff, GKK Soccom members, ug uban pang mga ministriya nga nagtabang sa pagpahiluna niini — sa mga donated goods ug cash nga nahatod sa maong adlaw.

Gilauman ang walay hunong nga suporta sa tanang mga GSLs sa Parokya sa San Miguel Arkanghel para mapadangat niini ngadto sa mga kaigsoonan nga mas labaw na nanginahanglan. Nagpasalamat ang parokya sa tanang mga sponsors/donors ning bag-ong programa.

VIVA 27th YEAR FOUNDING ANNIVERSARY SAN MIGUEL ARKANGHEL! (Lit Diana / SocCom Parokya sa San Miguel Arkanghel, Panacan)