Bug-os nga Tumong

Ika-15 nga Domingo sa Ordinaryong Panahon (July 11, 2021)
Am 7:12-15 / Ps 85:9-10, 11-12, 13-14 / Eph 1:3-14 or Eph 1:3-10 / Mk 6:7-13

Ang pagtuman sa kabubut-on ug katuyoan sa Ginoo mao ang kahingpitan sa bug-os nga tumong sa tawo. Gitawag sa Ginoo ang matag-usa sa nagkadaiyang paagi, apan sa usa lamang ka tumong ug katuyoan. Kini nagpasabot sa pagpili sa Ginoo sa tumong sa tawo. Ug kini nagpunting sa misyonaryong kinaiya sa Simbahan ug sa tawag sa tawo isip mensahero sa Pulong sa Ginoo.

Ang atong mga Pagbasa niining ika-Napulo’g Lima ng Domingo sa Ordinaryong Panahon, nagpunting sa tema nga “Pagpili sa Ginoo”. Ang mga pagbasa nagpahinumdom kanato nga ang pagpili sa Ginoo kanato dili lamang usa ka sulagma, apan usa ka tinuyo nga buhat. Niining Domingoha, gihatagan kita sa Simbahan og usa ka maayong higayon aron makapangutana kita sa atong kaugalingon: Unsa ang katuyoan sa Dios sa pagpili kanako ingon nga Iyang sinugo ug gituman ko ba kini nga katuyoan?

Diha sa atong Unang Pagbasa, gipili sa Dios si Amos – usa ka kabus nga mag-uuma, aron moadto ug managna sa amihanang gingharian sa Israel. Adunay mga propeta sa maong lugar, apan gikomprimiso nila ang ilang tawag sa pagnunot sa materyalismo. Imbis nga mosulti alang sa mga kabus, mahuyang ug dinaogdaog, nagsulti sila alang sa ilang mga bulsa, kwarta sa bangko, ug uban pa. Tungod niini, gibati sa Dios nga ang usa ka inosente nga kabus nga mag-uuma nga nahimulag gikan sa materyalismo sa panahon ug sa amihanang gingharian maoy angayan niining maong trabaho.

Sa atong Ikaduhang Pagbasa, wala mohunong si San Pablo pinaagi sa pagsulti kanato nga ang Dios nagpili kanato diha kang Cristo. Nagpadayon siya aron sultihan ug pahinumdoman kita sa katarungan nga gipili kita sa Diyos “Aron mahimo kita nga balaan, ug walay lama, ug mabuhi pinaagi sa gugma diha sa iyang presensya…” Sa yano nga pagkasulti, wala kita mabuhi alang sa kaugalingon lamang, apan kabahin sa atong pagpakabuhi ang pagtabang sa uban. Ang atong Ebanghelyo nagpunting niining duha ka katuyoan. Naggahin og panahon si Cristo aron maandam ang iyang mga tinun-an ug aron matabangan sila nga makab-ot ang nag-una nga katuyoan sa Dios sa ilang kaugalingon nga kinabuhi. Pagkahuman, gipadala Niya sila aron makab-ot ang ikaduha nga katuyoan ug kabubut-on – ang misyon sa ilang komunidad ug sa kalibutan. Kini ang gipasabut sa pagkahimong usa ka misyonaryo ug pagpalambo sa espiritu sa nga tinun-an nga tinuod usab diha kanato kinsa gipili nga mamahimong misyonaryo. Aron mahimo kini, kinahanglan dili kita maghinakog ug ang gugma kinahanglan magtukmod kanato sa pagdapit sa uban sa pagpaambit sa atong kasinatian.

Sa katapusan, aron masiguro nga ang Iyang mga tinun-an o kita dili mawala sa atong tumong ug katuyuan, gitudloan kita ni Cristo kung unsaon pag-adto sa atong misyon. Nakabalo si Jesus sa impluwensya sa materyalismo nga bisan kinsa posibling mabutahan sa iyang nag-una nga misyon. Aron magmalampuson sa misyon ni Cristo, kinahanglan magbantay kita bahin sa materyalismo o sa bisan unsang butang nga makabalda kanato sa pagtuman sa katuyoan ug kabubut-on sa Dios alang sa pagpili kanato. Busa, ang pagsunod sa mga panudlo ni Jesus mao ang sigurado nga paagi sa pagtuman sa katuyoan sa Dios. Ang atong pagpasagad mao ang pinakadaling buhat nga magwagtang sa pokus ug magpahulog kanato sa tentasyon. Subo nga pamalandungon nga kadaghanan sa atong lumilihok sa Simbahan o kitang tanang katawhan sa Dios, nawad-an sa saktong tumong sa atong misyon pinaagi sa pagsupak sa mga panudlo ni Cristo. Usahay malinga kita sa paghatag ug pagtagad sa punoan nga katuyoan sa atong misyon ug tawag isip mga Kristiyano. Busa, kinahanglan natong padayonong pahinumduman ang atong kaugalingon nga gipili kita sa Dios alang sa usa ka katuyoan, ug kinahanglan maninguha kita nga makab-ot kini.