Buak nga Panaad

Sa dagan sa panahon, daghan ang nausab sa panan-aw sa tawo sa hulagway sa mga butang sa iyang palibot, sama sa realidad sa Kaminyoon. Ang Diyos nga maoy nagmugna sa kaminyoon subay sa Iyang Balaang Plano ug kamandoan nga “walay makapahimulag niini” (Mt 19:6), ang tawo, luyo sa iyang kalibog sa kabag-ohan ug sekular nga panglantaw sa kalibotan, nakabig gikan sa maong kamatuoran. Misangpot kini sa panghunahuna nga ang kaminyoon mahimo diay nga dili usa ka permanente’ng kasabotan nga gilagdaan sa adlaw sa kasal tali sa lalaki ug babaye; nga ang kaminyoon mahimo nang isang-at sa korte aron ipadeklarar nga Annulled, o sa laing mga nasod, Divorced!

Ang Ginoo, sa Iyang gugma ug kalooy, nagpadayon pagbubo sa Iyang grasya diha sa Simbahan pinaagi sa mga Sakramento, usa niini ang Sakramento sa Kaminyoon. Kitang Iyang katawhan, ang Simbahan nga maoy Iyang lawas, nagapadayon sa Iyang misyon sa kaluwasan pinaagi sa pakigduyog sa paglakaw kuyog sa atong kaigsoonan nga nagkinahanglan sa atong pakig-uban kanila aron maminaw sa ilang kahigwaos ug kalibog.

Kini ang saysay sa usa ka magtiayon nga sila si Marv ug si Mel.

Dose na ka tuig ang kaminyoon nila ni Marv ug ni Mel ug gitogahan sila sa Dios ug duha ka anak. Si Marv, sanglit haligi sa pamilya, naninguha ug maayong panginabuhian sa laing nasod isip usa ka chef. Si Mel, miundang sa pagpanarabaho sa usa ka insurance company aron maatiman ang ilang mga anak.

Ang panaglagyo nila ni Marv ug ni Mel sulod sa dose na katuig, karon misangko sa walay maayo nga komunikasyon tali kanilang duha bisan ginamit ang bag-ong teknolohiya nga cellphone. Adunay mga problema sa ilang pamilya nga wala na mahatagan og kasulbaran tungod sa kakulangon sa panahon nga sila magka-istoryahanay. Kini nga problema misangko na sa wala nay maayong pagsinabtanay tali kanilang duha. Ang pagpakahilom na lamang maoy dali nilang paagi sa pagresolba tungod sa kakulangon sa ilang panahon ug presensya sa usag-usa. Sa laktod nga pagkasulti, si Marv ug si Mel, mibati na sa kahaw-ang ug kabugnaw sa ilang gugma hangtod nga misangko kini sa mas kumplekadong problema: si Marv nadani na sa laing babaye, ug si Mel sa lain babaye sama kaniya nga iyang naka relasyon. Ang ilang kaminyoon ug pamilya karon anaa sa dakong krisis.

Kini ang dakong hagit kanatong mga sumosunod ni Cristo sa pagpadayag sa Iyang malangkubong gugma ug kalooy ngadto sa atong mga igsoon nga sama kanila ni Marv ug ni Mel. Sa pinulongan sa atong mahal nga Santo Papa, Pope Francis, “The history of salvation is worked out in ‘hope against hope’ (Rom 4:18), through our weaknesses… most of God’s plans are realized in and despite our frailty…”. Atong natun-an sa kasaysayan sa atong Simbahan nga ang kaluwasan (salvation history) nahimo pinaagi sa dakong paglaum ug pagtoo sa gugma sa Dios sa atong mga katigulangan (ancestors); ug nga ang Iyang mga Balaang plano sa katawhan, Iyang gihimo ug gipakatawo luyo sa atong kahuyang.

Sa krisis nga gisagubang karon sa kaminyoon nila ni Marv ug ni Mel dili unta makapahugno kanato nga nagtan-aw kanila; hinunoa, tungod sa atong paglaum sa grasya sa Dios, makapadasig pa unta kini kanato sa pakig-uban kanila ni Marv ug ni Mel sa atong mga pag-ampo, ug sa pagdala kanila diha sa paglaum nga makab-ot unta nila ang ilang kalingkawasan. (Cynthia Chu)