Ang Ginoo naghatag og pan gikan sa langit

Ika-18 nga Domingo sa Ordinaryong Panahon (August 1, 2021)
Ex 16:2-4, 12-15 / Ps 78:3-4, 23-24, 25, 54 / Eph 4:17, 20-24 / Jn 6:24-35

Pipila siguro kanato nagbagulbol sa pagkakaron kung kanus-a pa man mahuman kining pandemya, ang mga lockdown ug kwarentina. Pipila kanato tingali nagbagulbol kanus-a pa man kita makabalik nga wala nay face mask, face shield, eskwela nga face to face ug uban pa. Pipila nato nagbagulbol kanus-a pa mahuman ang liquour ban.

Ang mga Israelita nagbagulbol usab diha sa unang pagbasa batok kang Moises ug Aaron tungod sa ilang kagutom ug kalisod nga nasinati sa ilang panaw. Apan ang Dios mipaulan kanilag pan aron ilang makaon ug mabuhi sila. Nasinati mo ba nga taliwala sa atong kalisod karon naghatag gihapon bisan sa simple ug ginagmay nga paagi ang Ginoo sa unsay atong gikinahanglan?

Aron kita padayon nga mabuhi nagpahimangno kanato si San Pablo diha sa ikaduhang pagbasa nga mobiya sa atong karaang kinabuhi. Kining kasinatian sa pandemya magtudlo unta kanato nga magbag-o pinaagi sa paglikay sa pagpamintaha sa uban ug motabang sa nanginahanglan, sa paglikay sa pagpangilad ug magmanggiluy-on sa uban, sa pagkaamgo nga dili na magpalabi sa kalibutanong kahilayan ug magsubay sa hustong dalan. Andam ka ba nga magbag-o?

Kanang maong pagbag-o hagit kanato diha sa Ebanghelyo ni Hesus sa iyang pag-ingon nga maghago unta kita dili sa pagkaon nga madunot kondili sa molungtad. Ang molungtad dili ang mga materyal nga butang sama sa unsay makahatag ug temporaryo nga kalami sa pagkaon, mga gamit o gadgets, kwarta, sinina ug uban pa, kondili ang bilihon nga pagtagad, pagrespeto, pagpaambit ug pagtabang sa uban. Kon isipon nato ang maayong buhat nga maoy makapabuhi kanato matag adlaw, tinuod gayod nga kini makapalahutay kanato sa pagbati sa kaanindot sa kinabuhi. Unsa bay imong gihaguan sa pagkakaron?

Inay nga magbagulbol kita, mas nindot tingali nga mamalandong kita kung unsa pay mabag-o dinhi kanato alang sa kalamboan sa atong pagkatawo. Mas makatabang kung maghago kita dili sa mga butang nga dili maoy makahatag og katagbawan sa atong kalag. Himumdomi nga ang Dios maghatag kanatog pan gikan sa langit.