Stewardship ipadagayday sa DADITAMA

Himoong sukaranan ang Pastoral Statement on Stewardship sa Catholic Bishops Conference of the Philippines nga gipagawas niadtong Enero 28, 2021 nga gipirmahan ni CBCP President Davao Archbishop Romulo G. Valles, D.D. alang sa pagahimoon nga module sa matag usa ka Dayosis sa Davao Digos Tagum ug Mati (DADITAMA) Sub-region.

Mao kini nakab-ot nga kasabutan sa mga Obispo, kaparian ug mga layko atol sa ulahing virtual nga panagtigom sa mga pastoral workers sa DADITAMA, Hunyo 1, 2021.

Gi-presentar ni Davao Auxiliary Bishop George Rimando ang natuki nga mga hisgutanan kon common framework kabahin sa stewardship kon pagka-piniyalan sa mga tagdumala pastoral sa DADITAMA niadtong Marso 24, 2021.

Sa pagahimon nga module sa matag dayosis, unang hisgutan ang katuyuan sa pagsagop sa stewardship (pagka-piniyalan) base sa CBCP Pastoral Statement on Stewardship, dayon ipahaom angkasinatian sa Dayosis kalabot sa stewardship.

“Himoon kining yano, dali masabtan ug creative,” si Bishop Rimando namahayag.

Lakip nga ipahaom sa module mao ang pagpasabot kon unsa ang Spirituality of Stewardship (SOS), ang pundasyon niini gikan sa panudlo sa Bibliya, Teolohiya, ug magisterium.

“Dako nga bahin sa on-going pastoral catechesis on stewardship kung unsa ang angayang unod; kinahanglan nga ma-explikar ang kahulugan sa Spirituality of Stewardship,” si Bishop Rimando nagkanayon.

“Pagsabot sa stewardship as a way life sa mga kaparian, relihiyoso ug mga layko,” siya midugang, “(ipasabot usab ang) canonical perspective on temporal goods, with emphasis on the giftedness especially on the theme of 500 Years of Christianity, ingon man ang sense of accountability and transparency.”

Gisugyot usab ni Fr. Russell Bantiles, kura paroko sa Pope John Paul II sa Ula, ug bag-ong natudlo nga Diocesan Schools Superintendent sa Dabaw, nga himoon niyang simple ngadto sa tulo lamang ka bahin: Introducton, Catechesis, ug Stewardship as a Way of Life.

Gitakdang pagahisgutan sa lain pang panagtagbo sa tagdumala pastoral ang termino nga pagagamiton alang sa gradwal nga pagbalhin gikan sa sistema sa arancel ngadto sa stewardship nga termino sa “halad pasalamat” o “ballik gasa nga gisugyot sa Diocese sa Mati alang sa paghatag sa mga Sakramento.

Gisugyot nga sugdan ang implementasyon niini sa Unang Domingo sa Adbiyento sa bulan sa Nobyembre ning tuiga. Hinoon, misugyot ang ubang kaparian nga sugdan ang implementasyon niini sa panahon nga andam na ang ilang module.

Sa Arkidayosis sa Dabaw, bag-o pa lamang gipagawas ang Primer alang sa Stewardship aron nga ipang-apod-apod ngadto sa mga Parokya apan wala pay module alang niini.

Samtang gitakdang tangtangon na ang mga fees sa Diocese sa Digos sa tuig 2022. (ASL)