Propeta: Suloguon sa Dios

Ika-14 nga Domingo sa Ordinaryong Panahon (July 4, 2021)
Ez 2:2-5 / Ps 123:1-2, 2, 3-4 / 2 Cor 12:7-10 / Mk 6:1-6

Kinsa ug unsa man ang propeta? Pipila ang nagtuo nga ang propeta mao ang tawo nga makatagna sa umaabot ug kini nga pagsabot mao lamang ang gituohan sa tanan. Apan ang bug-os nga kahulugan sa propeta mao nga siya tigpamaba alang sa laing tawo, labaw sa tanan alang sa Ginoo. Ang usa ka propeta nagduso sa pagsulti sa Pulong sa Dios, ug sa pagbuhat sa ingon, siya magtubag niadtong dili hingpit nga nagsunod sa kabubut-on sa Dios. Ang mga propeta, sama sa ubang mga mensahero, sagad nga giatake tungod sa mga mensahe nga ilang gipanulti. Dili ilang kaugalingong mga pulong ang ilang gisangyaw, apan ang Pulong sa Dios. Kadtong dili andam nga mamati sa Pulong sa Dios ug adunay kasilag sa Dios masilag gayod sa sinugo sa Dios.

Ang atong mga pagbasa karon nagpadayag kanato sa bug-os nga kahulugan sa propeta. Ang Unang Pagbasa naghulagway sa kasinatian ug misyon ni Ezequiel isip tinawag nga propeta. Ang atong Salmo naghulagway sa mga papel sa mga tawo kinsa gitawag sa Dios aron mahimong mga suloguon sa Ginoo – usa ka papel nga naglakip sa pagsalikway ug pagbiay-biay. Si San Pablo, diha sa atong Ikaduhang Pagbasa, nagtapos sa iyang Sulat ngadto sa Taga-Corinto nga naghulagway kon sa unsang paagi siya nagmatinud-anon ug makalahutay sa iyang tawag isip apostol ug sa pagmantala sa Maayong Balita taliwala sa mga kalisdanan. Ug ang Ebanghelyo nagsaysay sa pagbalik ni Jesus ngadto sa Iyang lungsod sa Nazaret, ug ang kapakyasan sa mga tawo sa pag-ila sa Iyang mission tungod kay sila naghunahuna nga sila “nakaila ug nakahibalo na kaayo” Kaniya.

Mga igsuon, usahay, kon dili man kanunay, ang atong kahibalo nagkulong kanato sa mga pagtulon-an. Dili na kita andam o abli nga maminaw sa laing mga pagtulon-an kay kita nagtuo nga ang atong kahibalo og kaalam sakto na ug dili na angay nga kuhaan o dungagan. Apan ang atong mga pagbasa karong domingoha nagtudlo kanato nga kita mamahimong abli sa lamdag sa Espiritu Santo ug sa pagpaminaw sa mga Pulong sa Ginoo pinaagi sa Iyang mga instrumento – ang mga propeta, labi na si Jesucristo. Tinuod, makaingon ta nga wala namay propeta karong panahuna, o wala naman sa kalibutan si Jesucristo; apan dili nato kalimtan nga ang mission ni Cristo, iya nang gitahas kanatong mga binunyagan. Pipila kanato daghan na kaayo’g nakat-onan, sakto na sa kahibalo ug kaalam. Apan wala kini nagpasabot nga kita dili na mamati o maminaw sa mga giisip nato nga “kulang sa kahibalo” sama sa wala nakahuman sa pagtuon o sa mga ordinaryong tawo sa atong palibot. Basin baya mas dulot pa sila sa kahibalo tungod sa ilang kasinatian kumpara sa atong nakat-onan sa mga libro. Sa mga naila nga mga palahubog, druglord, kawatan o tanang mga problematic nga mga tawo pananglitan. Wala nagpasabot nga kay sila daotan, dili na nato sila paminawon. Sila adunay mga pagtulon-an usab nga ikapaambit o ang ilang mga istorya sa kinabuhi usa mismo ka pagtulon-an nga dili angay sundugon.

Kitang tanan gitawag nga mamahimong mga propeta sa Ginoo – mga suluguon, mga mensahero ug mga instrumento aron mapalapnag ang Pulong sa Dios. Apan kini wala nagpasabot nga kita dili na usab andam nga maminaw o mamati sa uban.