Pagmabungahon sa Pagtuo

11th Sunday in Ordinary Time (June 13, 2021)
Ez 17:22-24 / Ps 92:2-3, 13-14, 15-16 / 2 Cor 5:6-10 / Mk 4:26-34

Kung wala ang Dios, ang tanan mahimong walay pulos ug wala’y kahulogan. Ang bugtong dunay kahulugan kon wala ang Dios mao ang tawo. Ang tawo kanunay nga nagbag-o, kanunay nagtinguha sa kaugalingon nga kaayohan, kanunay nga magpangita sa dungog, bahandi ug gahum. Apan walay pulos ang tanang paningkamot sa tawo kon malimot na siya sa iyang Ginoo.

Ang atong Unang Pagbasa nagpahinumdom kanato nga ang Ginoo Ginoo ug kitang mga tawo dili Ginoo ug dili nato kontrolado ang kalibutan ug ang tanang anaa niini. Gihatagan kita ug duha ka leksyon: Sunda ang Ginoo ug ang imong kinabuhi mamaayo! Bulag sa Ginoo ug ang imong kinabuhi mahimong delikado. Ang Ikaduhang Pagbasa nagtudlo kanato nga kung kita magalakaw pinaagi sa pagtuo, maminaw kita sa Pulong sa Ginoo ug maninguha sa pagkinabuhi nga Maayo. Kung maglakat lamang kita pinaagi sa panan-aw ug wala ang pagtuo, kini dilikado kay ang kalibutan nagpakita kanato nga dili kinahanglan ang Ginoo – usa ka binuang lang na nga hunahuna sa mga tawo ug ang kinabuhi labing maayo kung wala ang Ginoo.

Diha sa atong Ebanghelyo, si Jesus migamit og sambingay ug imahe. Ang Gingharian sa Dios gamay ra kaayo ug kana ang hinungdan nga daghan ang dili makakita niini. Dili gamay ang gindak-on, apan gamay kaayo ang pultahan niini sulod kanato ug sa sulod sa atong katilingban. Wala nato gihatagan ug higayon nga makatubo kini ug molambo diha sa atong tagsatagsa ka kasingkasing diin napuno sa mga binhing kalibutanon. Usahay, kon dili kanunay, nagtuo ta nga kita nagmalampuson tungod sa atong kaugalingong paningkamot lamang.

Kung ang atong kalibutan magpadayon sa pagbiya sa Dios, dili lamang grabe nga mga butang ang mahitabo kanato. Ang atong pagtuo maoy atong suga ug ang ang mga buhat nga maayo maoy atong dalan paingon niining maong Gingharian. Palamboon ug pabungahon nato ang atong pagtuo sa Ginoo dili ang pasalig sa tawhanong kahibalo. Niining panahon sa pandemya, pananglitan, ang Dios nag hunghong kanato “Dangop kamo Kanako!”

Wala gayud gipamugos sa Diyos ang Iyang kaugalingon ngari kanato. Apan kanunay nato nga madapit ang Diyos nga motubo sulod kanato ug sulod sa atong katilingban. Ang pangutana, gidapit ba nato Siya? Ang Dios kanunay nagtrabaho ug kanunay nahigugma kanato. Ang atong pagtuo maoy bugtong yawe nga makasulod sa atong kaugalingon ang Ginoo. Siya kanunay andam nga muhatag sa atong gikinanglan aron kita mutubo ug mulambo. Apan gi-ablihan ba nato ang atong mga mata ug kasingkasing ngadto Kaniya?