Media ug Simbahan Motabang sa Blue Heart Campaign Batok Human Trafficking

Gidapit ang mga anaa sa mass media ug mga naglihok sa Simbahan nga makigtambayayong alang sa pagpakigbatok sa human trafficking isip pagpangandam alang sa umaabot nga kasaulogan sa World Day Against Trafficking in Persons karong Hulyo 30, 2021.

Ang United Nations Office on Drugs and Crime nagtakda sa tema sa kasaulogan karong tuiga mao ang “Victims’ Voices Lead the Way” nga nagbutang sa mga biktima sa human trafficking sa sentro sa kampanya ug hatagan ug pagtagad ang kamahinungdanon sa pagpaminaw ug pagkat-on gikan sa mga nakalingkawas gikan sa human trafficking.

Sa makadaghan nga higayon hugot nga gikondena ni Papa Francisco ang pagpayuhot sa katawhan isip mga butang nga baligya, sa pag-ingon nga usa kini ka krimen batok sa katawhan dungan sa panawagan alang sa tanan sa pagpakigbatok niini ug sa pagpangita ug pag-atiman sa mga biktima.

Ning tuiga, gihandom ang INTERNATIONAL DAY OF PRAYER & AWARENESS AGAINST HUMAN TRAFFICKING niadtong Pebrero 8, ang kapistahan ni Josephine Bakhita, usa ka Sudanese nga ulipon, gihatagan ug kagawasan ug nahimong us aka madre nga Canossian, nahimong Santa niadtong tuig 2000.

Isip pagpangandam alang sa umaabot nga World Day Against Trafficking in Persons karong Hulyo 30, 2021, gisugdan na sa nagkahiusa nga mga pundok sa mga naglihok batok sa human trafficking gikan sa pribado, gobyerno ug simbahan nga sektor ang pagdapit sa mga sakop sa media ngadto sa usa ka Media Forum Series on Trafficking in Persons and Online Sexual Abuse and Exploitation ug sa pagtahan alang sa BLUE HEART CAMPAIGN.

Ang Blue Heart kon asul nga kasingkasing giila isip mao ang internasyonal nga simbolo batok sa human trafficking, nga nag-simbolo sa kaguol alang niadtong mga nabiktima ug nagpahinumdum sa tanan sa kabugnaw sa kasingkasing niadtong mipalit ug mibaligya sa isigkatawo.

Gipangunahan kini sa Talikala, Inc., usa ka non-government organization nga naglihok batok sa human trafficking kinsa nagdapit sa pipila ka mga sakop sa Media gikan sa Davao Region aron nga masabtan ug mahisgutan pa ug lalom ang kabahin sa human trafficking sa ilang tagsa-tagsa ka plataporma. Ang unang online session gipahigayo niadtong bulan sa Mayo samtang ang ikaduhang session gitakda niadtong Hunyo 17, 2021.

Gibutyag ni Jeannette Ampog, Executive Director sa Talikala, Inc. nga ang maong proyekto gisuportahan sa laing non-government organization nga mao ang AWO International, natukod niadtong 1998 isip us aka professional association alang sa development cooperation and humanitarian action sulod sa framework sa German welfare organization “Arbeiterwohlfahrt”.

Sa pakigtambayayong sa lokal nga mga partner organizations, nagtahan ang AWO International sa pagsuporta sa mga kabus ug mga disadvantaged groups sa katilingban sa pagpalamabo sa ilang kinabuhi.

Gawas pa niini, gisugdan na usab sa simbahan pinaagi sa Sisters Association of Mindanao kon SAMIN, ang kampanya sa pagpasabot sa human trafficking mga sub-regions sa Davao Digos Tagum of Mati (DADITAMA), Bukidnon ug Cagayan de Oro (BUCAG), Dipolog, Ozamiz, Pagadian, Iligan and Marawi (DOPIM) ug uban pa.

“Target sa maong kampanya dili lamang sa mga barangay ug mga tulunghaan apan ngadto sa mga Gagmay’ng Kristohanong Katilingban (GKK/BEC),” si Ampog nagkanayon.

Dinhi sa Davao Region, aktibo ang Regional Inter-Agency Council Against Trafficking kinsa nangandam karon alang sa Blue Heart Campaign, nga nagtumong sa pagpauswag sa kahimatngon ug mga inisyatibo sa pagpakigbatok sa human trafficking ug ang impact niini sa katilingban.

Gibutyag ni Ampog nga “ang giangandaman nga kalihukan alang sa Hulyo 30 mao ang spoken poetry.” Gitakda usab sa Hulyo 28 nga ipahigayon ang Multi-Sectoral Stakeholders Summit alang sa Trafficking in Persons (TIP) diin dapiton usab ang mga sakop sa media isip mga partners alang sa adbokasiya, si Ampog nagkanayon.

Ang Inter-Agency Council Against Trafficking (IACAT) mao ang pundok nga gimando sa balaod aron nga mo-coordinate ug monitor sa pagpatuman sa Republic Act No. 9208, o ang Anti-Trafficking in Persons Act of 2003, inubanan sa Department of justice isip maoy lead agency. Namugna kini ubos sa section 20 sa R.A. 9208, ug gilangkuban sa mosunod nga mga ahensya sa gobyerno ug pribadong sektor.