Madasigon nga Pagtoo: Pangama ni San Antonio

“SAN ANTONIO DE PADUA: MODELO; GIGASAHAN SA PAGHATAG OG PAGTOO UG PAGLAUM SA TANANG KATAWHAN ILABINA KANATONG MGA PAROKYANO, NIINING PANAHON SA PANDEMYA.”

Mao kini ang nindot nga tema ug haum sa panahon sa among pagsaulog sa ika-58 nga kapistahan sa parokya sa San Antonio de Padua, Agdao niadtong Hunyo 13, 2021. Giila si San Antonio isip usa ka Patron sa mga nangawalang butang, duolon sa mga babayeng nangita’g pamanhunon, duolon sa mga magtiayon nga walay anak, ug sa mga nangita ug trabaho. Bago pa man magsaulog sa ika-58 nga kapistahan, gisugdan una kini og siyam ka adlaw nga pag-ampo sa Santos nga Rosaryo, Novena alang kang Sr. San Antonio de Padua, ug Novena Mass niadtong Hunyo 4 (kwatro) hangtud Hunyo 12 (dose) nga pinagulohan sa mga kaparian nganhi sa bikaryato sa Sta. Ana.

Niadtong Hunyo 13, Kapistahan ni San Antonio de Padua, gisugdan ang maong kasaulogan pinaagi sa Pontifical Mass sa alas (10) diyes sa buntag nga gipangulohan ni Rev. Msgr. Paul Cuizon, Vicar General sa Arkideyosis sa Dabaw, kauban ang mga igsoong pari nga sila Rev. Fr. Louie Jasper V. Alfeche, Rev. Fr. Marvin M. Del Campo, Rev. Fr. Arnel Godin, MOP, Rev. Fr. William Cajes ug Rev. Fr. Ronald Arcillas. Sa homiliya ni Msgr. Paul, iyang gisaysay kung unsa ka mahinungdanon ang atong pagtoo ilabina nga kita nagsaulog sa ika-500 (ikalima ka gatos) nga tuig sa atong pagka-Kristiyanos. “We live by faith and not by sight, we should always see the picture and cooperate in God’s grace.” “Pinaagi sa pagtoo, makatuon kita sa lesson sa kinabuhi.” dungag pa niya.

Bago gitapos ang Santos nga Misa, gipasalamatan ug gi-surpresa nga malipayon ni Rev. Fr. Amado B. Arroyo Kura Paruko, ang mga Parokyano pinaagi sa usa ka video greeting nga gipaabot sa atong halangdon nga Arsobispo sa Dabaw ug CBCP President nga si Arsobispo Romulo G. Valles, D.D. Nagpasalamat ang Arsobispo sa mapadayunon nga pagpadayag sa mga parokyano sa ilang pagtoo nga dinasig ni San Antonio de Padua ilabina niining panahon sa pagsulay.

Nasaksihan usab sa mga parokyano ang pagpanalangin sa newly constructed nga PDART Mini Clinic nga usa sa mga proyekto sa maong parokya paghuman sa Santos nga Misa. Ang PDART o Parish Disaster Action Response Team, ang mga volunteers nga nagabantay ug naga-implementar sa pagsunod sa mga luwasnong protocol, dako gayud kini og matabang ilabina kung adunay mga panghitabo, mahatagan dayon og hinanaling aksiyon o kasulbaran.

Sumala pa ni Bebeth Pangan, usa sa Technical Committee, dili sayon ang pagpadagan, pagbuhat ug pagpangandam sa maong kapistahan kay tungod birtwal kini ug dili sama sa naandan apan, tungod sa pag-ampo ug pagpaningkamot, nagpakita kini og maayong resulta luyo pa man sa mga kahadlok ug kalisdanan nga ilang nasinati. Usa ang Technical Committee sa mibuhat og Animation bahin sa kinabuhi ni San Antonio de Padua, matan-aw kini pinaagi sa facebook account/page sa Parokya, San Antonio de Padua-Agdao.

Tungod sa pandemya, wala una’y mga naandang aktibidad ilabina ang pagtapok-tapok busa gihimong pag-indigay sa parokya ang paghimo sa LOGO UG TEMA (Logo and Theme Contest) ngadto sa mga Gagmay’ng Kristohanong Katilingban (GKK) sa (9) siyam ka zona alang sa kapistahan. Ning daog sa logo ang St. Mary GKK gikan sa Zone 1 ug midaog ang San Roque, NHA-A nga gikan sa Zone 6 sa paghimo sa tema.

Dili mamahimong posible kining maong kapistahan kung wala ang mga maabtikon nga mga membro sa nagkalain-laing ADHOC Committees nga gipangulohan ni Rev. Fr. Amado B. Arroyo isip Chairman ug Rev. Fr. Reyjie C. Penecios isip Assistant Chairman kauban ang Finance, Arts & Decoration, Program, Secretariat, Restoration, Worship & Liturgy, Steering, ug Technical. Nagmalampuson ang pagsaulog sa kapistahan bisan pa man sa hulga niining makatakod nga sakit nga COVID -19, nagpakita lamang kini nga ang pagtoo sa mga Parokyano sa San Antonio de Padua sa Agdao, BUHI UG LIGDONG. (Luigi and Justin T. Felicia | SAdePP Agdao SocCom)