KNOT: Joel

Dear KNOT,

Ipaambit ko lang sa kadaghanan ug unta nga mamahimong inspirasyon sa uban. Itago na lang ako sa ngalang JOEL, 42 anyos, minyo ug dunay 1 ka anak nga babae — 3 years old. Kaniadto kami sa akong asawa naghandum ug maka anak dayun sa hinanaling panahon human kami ikasal.

Milabay na lang ang pipila ka mga katuigan wala pa man na buros si Misis. Among gidudahan nga ug basin dunay usa namo nga walay kapasidad sa paghimo niini. Busa nagpakonsulta ming duha sa eksperto. Salamat sa GINOO ug walay diperensiya nga nakitaan.

Nahibulong mi nga kung okay ang tanan nganong dili man mi makabu-o. Nabalaka na pag-ayo si Misis ug basin maabtan na siya sa menopausal stage. Nagdisisyon kami ni Misis nga iampo na lang kining tanan. Adlaw-adlaw mi nga naga-ampo sa Santos nga Rosaryo. Halad pag-ampo nga aron magasahan kami og anak.

Milungtad og 8 years ang among pagpaabot nga tubagon sa GINOO ang among mga pag-ampo. Naburos na jud ang akong asawa. Hasta namong lipaya sa mga panghitabo. Among naangkon ang dugay na namong gipaabot sa igo ug taknang panahon. Tinuod nga ihatag gayud sa Ginoo ang atong mga panginahanglan ug kagustohan base sa kabubut-on sa Dios Amahan.

Maayo kaayo ang Ginoo taliwala sa atong pagka-dili angayan, pagkamasinupakon, garboso ug daghan pa. Hinumduman lang nga bisan sa atong pagkamahuyang, sangpit lamang kita Kaniya sa kanunay ug Siya motubag sa taknang oras, adlaw o panahon.

Daghang Salamat.

P.S. Atong hinumduman ang pagkamapailubon usa ka kalidad sa Dios, ug gihatag ngadto sa magtutuo isip usa ka bunga sa Espiritu. Sama sa nahisulat sa “Genesis 21:2 Namabdos si Sara ug nanganak og lalaki bisan tigulang na si Abraham. Natawo ang bata sa panahon gayod nga gitakda sa Dios.”