Sinilyohan nga Kasabutan

Solemnity of the Most Holy Body and Blood of Christ / Corpus Christi (June 6, 2021)
Ex 24:3-8 / Ps 116:12-13, 15-16, 17-18 / Heb 9:11-15 / Mk 14:12-16, 22-26

Sa atong kalendaryo sa liturhiya, adunay duha ka kasaulogan nga nagdapit kanato sa pagpamalandong sa mga misteryo sa Santos nga Yukaristiya: ang Huwebes Santo sa Misa sa Katapusan Panihapon; ug ang kapistahan sa bililhong Lawas ug Dugo ni Cristo diin maoy atong gisaulog niining Domingoha.

Ang Liturhiya sa Pulong niining kapistahan sa Lawas ug Dugo ni Cristo o naila nga Corpus Christi, nagdapit kanato sa pagtan-aw sa Yukaristiya isip usa ka kasabutan. Ang Unang Pagbasa nagpunting sa kasabutan nga sinilyohan sa dugo sa gisakripisyong mananap. Ang Ikaduhang Pagbasa nagpunting sa usa ka kasabutan nga gisilyohan sa dugo ni Cristo kinsa mao ang tiunay nga Sakripisyo. Ug diha sa Ebanghelyo, gitukod ni Jesus ang Santos nga Misa diin Siya ang Pari ug usab ang Sakripisyo.

Ang bag-ong kasabutan mao nga ang Dios wala na mi sugo kanato sa pagpikas sa mga hayop ngadto sa duha ka bahin sama sa gibuhat ni Abraham, o sa paggamit sa dugo sa mananap nga ibubo sama sa gibuhat ni Moises. Apan sa bag-ong kasabutan, si Jesus mipikas sa Iyang Kaugalingon nga Lawas ug mibubo sa Iyang kaugalingon nga Dugo ingon nga simbolo niining maong kasabutan. Pinaagi sa pagbuhat niini, ang Ginoo wala lamang nagbayad sa mga kasal-anan sa pagka dili matinud-anon sa tawo, apan siya nagbag-o usab niining maong kasabutan. Nan, kining maong kasaulogan sa Lawas ug Dugo ni Cristo usa ka kasaulogan sa kinabuhi, kaluwasan ug grasya. Kung magmatinud-anon kita sa kasabutan, maangkon nato ang grasya nga atong gikinahanglan, makab-ot nato ang kaluwasan ug mahuptan nato ang kinabuhing walay katapusan.

Matag saulog nato sa Santos nga Misa, atong gihandum ang atong kasabutan tali sa Ginoo. Ug matag kalawat nato sa Lawas ug Dugo ni Cristo gidawat ug giuyonan nato kining maong kasabutan. Hianut nga ang Lawas ug Dugo ni Cristo nga atong pagadawaton ug atong pagakaonon, maghatag kanatog dugang kusog ug kaisog aron magmatinud-anon sa atong kasabutan tali sa Ginoo nga sinilyohan sa Dugo ni Cristo. (Sem. Junel Bustamante)