Kahingpitan sa Panaghiusa

Solemnity of the Most Holy Trinity (May 30, 2021)
Dt 4:32-34, 39-40 / Ps 33:4-5, 6, 9, 18-19, 20, 22 / Rom 8:14-17 / Mt 28:16-20

Dili na bag-o alang kanato ang ideya nga adunay usa ka Dios. Ug kita hingpit nga midawat nga kining usa ka Dios mao ang Amahan, ang Anak ug ang Espiritu Santo. Apan daw nagkasumpaki kining maong ideya. Unsaon man pagkahimo sa usa ka Dios apan tulo ka Persona? Kini usa ka misteryo nga bililhong pamalandongan.

Kita kinahanglan nga makasabot nga ang Dios – ang Amahan, ang Anak ug ang Espiritu Santo – mao ang tulo ka Diosnong Personas. Matag usa lahi sa duha. Ang matag Persona adunay usa ka hingpit nga salabutan ug kabubut-on. Ang matag usa makahimo sa pag-ila ug paghigugma ngadto sa usa ka hingpit nga paagi. Ug kining maong “kahingpitan” sa ilang mga abilidad nga mahibalo o moila ug gugma, maoy naghimo kanilang Usa. Ang matag usa kanila nakig-ambit sa usa ka Diosnong kinaiya, ug sulod nianang maong Diosnong kinaiya, ang tulo ka persona hingpit nga nagkahiusa. Kini nagpasabot nga ang matag usa nasayud ug nahigugma sa laing duha sa hingpit. Ug kining maong kahibalo (usa ka buhat sa ilang hingpit nga salabutan) ug gugma (usa ka buhat sa ilang hingpit nga kabubut-on) nagdala sa usa ka panaghiusa nga lawom ug mahinungdanon diin sila buhi ug naglihok ingon nga usa ka Dios.

Ang panaghiusa sa Tulo ka Persona pinaagi sa Ilang tagsa-tagsa ka kahibalo ug gugma, nagtanyag usab sa matag usa Kanila sa hingpit nga katumanan ingon usa ka Persona. Kini nagpakita nga ang “pagkatawo” o “personhood” matuman o mahingpit pinaagi sa panaghiusa. Kini usa ka maanindot nga pagtulon-an alang sa matag usa kanatong mga tawo.

Dili kita Dios, apan kita gibuhat sa Dios sa iyang larawan ug panagway. Busa, atong makita ang katumanan sa samang paagi nga ang Dios nagbuhat kanato. Kita makakaplag og katagbawan sa kinabuhi pinaagi sa atong paghigugma sa uban ug sa atong gawasnong kabubut-on sa pagsabot sa matag tawo ug sa pag-inambitay uban kanila. Ang tanang mga relasyon gitawag sa pagpakig-ambit ngadto sa kinabuhi sa Dios diha sa kinaugalingon ug talagsaon nga paagi. Sama na lamang sa tanyag ni Jesus nga himuon nga mga tinun-an ang tanang katawhan sa ngalan sa Santisima Trinidad ug tudloan sila pagtuman sa tanan nga Iyang gisugo uban sa kasiguroan nga Siya magauban kanunay.

Sa atong pagsaulog niining kapisahan sa Santisima Trinidad, diha sa nagkadaiyang relasyon diin gitawag kita sa Dios – pagka pari, relihiyosa/relihiyuso, minyo o ulay – kita mamalandong: Hingpit ba natong gisunod ang gugma sa Tulo ka Personas diha sa atong relasyon? (Sem. Junel Bustamante)